2018 Ayat Festival iti LU, nangrugin

August 20, 2018 Headlines

BACNOTAN, LA UNION – Nangrugi manen ti kadakkelan a pagteng a mangitantandudo iti pagsasao nga Ilokano.
Nailukat ti pannakarambak ti 8th Ayat Festival idi Agosto 13, 2018 iti Bacnotan Plaza Covered Court iti tema a “Pabaknangen ti Kultura ken Lengguahe nga Ilokano”.
Naipakita ti kultura, kannawidan ken kaugalian dagiti nagduduma a komunidad babaen ti Streetdance Showdown a nakipasetan dagiti nagduduma a pagadalan manipud iti pito a munisipio ken maysa a siudad iti probinsia.
Iti maikaduan a tawen, naala manen ti Santo Tomas ti championship iti impalabasda a Daing Festival, first runner up ti San Fernando City-Pindangan Festival, ken second runner up ti Caba-Timpuyog Festival.
Dagiti dadduma pay nga entries ket pakaibilangan ti Bangus Festival ti Aringay, Tinungbo Festival ti Pugo, Kawayan Festival ti Sudipen, Diro Festival ti Bacnotan, ken Basi Festival ti Naguilian.
Kas nangibagi iti amana a ni Gov. Francisco Emmanuel “Pacoy” R. Ortega III, impaganetget ni Raphaelle Veronica A. Ortega iti bitlana ti kinapateg ti lokal a lengguahe ken kultura a maitutup iti panangipangruna ti probinsia iti pannakausar ti maysa a pagsasao a nainsigudan ngem addaan ti moderno nga identidad tapno agtutuloy a mausar nangruna kadagiti agtutubo.
“Our language and history tells of the profound and powerful bond between Ilocanos and nature. It is high time we return to our roots and renew and reinvigorate that connection. This is what our Ayat Festival is about – a celebration of the Ilocano people and our homeland,” kinunana. “Please join us in showing the country and the world, the universe rather what being Ilocano is about. Let us join our hearts and minds in the spirit of unity and love for all that is Ilocano.”
Kabayatanna, naisayangkat ti baro a version ti La Union Henio no sadino ket nagpinnalaingan dagiti estudiante iti maysa nga ay-ayam ti Q&A ti sao nga Ilokano ken sumagmamano a pakasaritaan ken kaugalian ti La Union.
Iti Elementary Category, nangabak ti Pugo kas champion bayat a runners-up ti Bangar, Bacnotan ken Sudipen.
Iti High School Category, champion ti Bacnotan, bayat a first, second ken third runners-up ti Santo Tomas, Santol ken San Juan.
Dagiti daduma pay nga aktibidad ti Ayat Festival ket pakaibilangan ti Iskrabiloko (scrabble nga Ilokano), Salip iti Deklamasion, Ilokano Chorale ken Iloko Essay Contest manipud Agosto 23 inggana 24 iti Diego Silang Hall, Provincial Capitol, City of San Fernando, La Union. JALG, PITO-La Union / ABN