7 barangay ti Agoo, nakaawat ti P14M manipud Salintubig

October 21, 2017 Headlines

AGOO, LA UNION – Pito a barangay ditoy nga ili nga agkasapulan ti pangalaan ti mainum a danum sipud pay idi 1990 earthquake ti immawat ti P14 million a financial assistance manipud iti Sagana at Ligtas na Tubig (Salintubig) program ti Department of Interior and Local Government.
Naala ni La Union 2nd District Representative Sandra Young Eriguel, chairman ti Committee on Social Services ti Kongreso, ti pondo ti proyekto para kadagiti barangay ti Ambitacay, Balwarte, San Isidro, San Manuel Norte, San Nicolas West, San Roque East ken San Roque West.
“Most of the sources of potable water supply in these barangays were destroyed during the 1990 earthquake which also damaged almost the whole water system of Agoo. We lack potable water for the past 25 years,” kinuna ni Eriguel.
Ti munisipio ti Agoo, babaen kenni Mayor Stefanie Ann Eriguel, ket nakitinnulag iti Metro Agoo Waterworks Inc. (MAWI) nga inbagi ni Roderick Ongcarranceja, MAWI president, tapno maipatungpal ti proyekto.
Ti pannakapirma ti kasuratan ket naimatanganda Jolly Ting, MAWI board chairman, dati a kongresista Franny Eriguel, Atty. Rody Rivera, dagiti kameng ti municipal council ken opisial dagiti pito a barangay.
“The Salintubig program in Agoo is a shining example of a public-private partnership. It is in the cooperation of these two sectors that will spur progress and economic sustainability,” kinuna ni Ting.
Ti MAWI ti mangikapet kadagiti tubo a pagnaan ti danum iti sumagmamano a kabalbalayan bayat a dagiti dadduma pay a lugar ket maaddaan ti gripo a mabalin a pagsakduan dagiti lumugar.
Dagiti barangay officials, kadwa dagiti MAWI personnel, ti ag-monitor iti proyekto ken mangsigurado nga adda ti agtultuloy a suplay ti danum.
Ti MAWI ket maysa a subsidiary ti Calapan Waterworks Corp. Nangrugi ti operasion daytoy iti Agoo idi 2016 babaen ti pananglukat ti infiltration well iti igid ti Aringay River idiay Barangay Garcia Tubao, La Union.
Ti dakkel a supply ti nalinis ken mainum a danum ket agay-ayus iti 10 kilometro a moderno nga transmission lines manipud Tubao inggana Agoo. Addan ti agarup 60 kilometro nga distribution pipelines a naikapeten kadagiti kabalbalayan ken dadduma pay a pasdek. ERWIN BELEO / ABN