AGINDEG TI ILOCOS NORTE DAWATDA NABABBABA A PRESIO TI KORIENTE

July 23, 2022 Headlines

LAOAG CITY, Ilocos Norte – Sumagmamano nga agindeg iti Ilocos Norte, kaaduan ket managlugan (riders) iti kimmadua iti maysa nga electric price hike motorcade idi Huebes (Hulio 21) a kidkiddawenda iti Ilocos Norte Electric Cooperative (INEC) ken dadduma pay a maseknan nga autoridad a tumulongda a pababaen iti nangato a presio ti koriente iti probinsia.
Agingga Hulio, iti presio ti koriente a masingsingir kadagiti consumer ket nakatakder a PhP18.56 per kWh, nangatngato ngem kadagiti sabali a probinsia nga iti presioda ket manipud PhP9.47 per kWh agingga PhP16.49 per kWh kas kadagiti electric cooperatives iti Benguet, Isabela, Ilocos Sur, Pangasinan, Ifugao, ken Nueva Vizcaya.
Maysa a makinkua iti cellphone repair shop nga simmurot iti parada a ni Ronaldo Nacional, 40, agnanaed iti Barangay 11 Santa Balbina, Laoag City ket imbagana iti maysa nga interbiu nga iti ngumatngato a presio ti koriente ket di maibturannen ken nakadagdagsen iti bulsana.
“Idi ket agbaybayadak laeng iti promedio a binulan nga electric bill a PhP1,600 ngem ngimmaton daytoy agingga PhP3,500,” kuna ni Nacional nga innayonna nga iti babayadan iti koriente ket nangatngaton ngem iti abang ti balay.
Pangpanggepen met ni Nelly Cristobal, maysa a makinkua iti resort idiay ili ti Pagudpud nga isardengnan iti operasion tapno makainot iti koriente nga iti matalimengna ket usarenna laengen para kadagiti estudiante a mangsupsuportar iti bagbagida nga agtrabtrabaho para kenkuana idiay Casa Victoria.
“Nagrigat a panunoten nga iti napalabas a tallo a bulan, agbaybayadak iti kastoy a nakadakdakkel a gatad ken saan met a kanayon a napunno ket saan a kasta kaadu dagiti siledko no maidilig kadagiti dadduma,” kuna ni Cristobal, nga impostna iti babayadan iti koriente para Hulio nga PhP234,070.63 iti social media.
Kas panangipangag iti kalikaguman ti publiko, inpanamnama manen ni Governor Matthew Joseph Manotoc kadagiti umili nga iti gobierno ti Ilocos Norte, kadua dagiti sabali a maseknan nga autoridad ket agtrabtrabahodan tapno maipababa iti presio ti koriente iti Ilocos Norte, nga agdindinamag a renewable energy capital of the Philippines.
“For the past few months, I have been working with INEC, the national government, and relevant parties to lower our electricity rate. However, it is a complicated and long process that I do not fully control (Iti naglabas a sumagmamano a bulan, kaduak nga agtrabtrabaho iti INEC, iti nasional a gobierno, ken dagiti napateg a partido tapno maipababa iti presio ti koriente tayo),” kuna ni Manotoc nga inkarina nga aramidenna amin tapno mapalag-an iti tuok iti koriente dagiti consumer.
Kas suporta iti daytoy nga addang, immunan a nakisarita ni Congressman Ferdinand Alexander Marcos iti First District ti Ilocos Norte kenni Commissioner Alexis Lumbatan iti Energy Regulatory Commission tapno pagsaritaanda iti nangato a presio ti koriente iti probinsia.
Sigun iti lehislador, nagkari iti ERC a sukimatenda iti pakaigapuan iti panagngato dagiti presio ti koriente baeten iti panangrepaso kadagiti power supply contracts ti INEC tapno maammuan no addaan iti over-contracting of capacity iti INEC para iti franchise area daytoy nga mabalin a pakaigapuanan iti ingangato iti presio, ken dadduma pay.
(LA-PNA Ilocos/PMCJr.-ABN)