Baguio, may nasisilip nang sulusyon sa problema sa basura
LUNGSOD NG BAGUIO – Patuloy pa rin ang pamahalaan ng lungsod sa paghahanap ng pangmatagalang solusyon sa problema nito sa basura.
Ito ay sa gitna ng inilalakad na proseso upang magamit ang 24.11 ektarya sa Antamok open pit site na donasyon ng Benguet Corporation. Isinagawa ang surveying sa naturang lugar noong Martes.
Ayon kay Mayor Mauricio Domogan, umaasa itong magamit ang naturang lugar para mapagtayuan ng engineered sanitary landfill para sa binubuong waste disposal system ng lungsod.
Sinabi ng mayor na kapag naayos na ang kasunduan sa Benguet Corporation ay maaaring magamit ng lungsod nang libre ang lugar sa loob ng 25 taon.
Nagsimula na rin ang schedule for bidding para sa apat na garbage truck na idaragdag na gagamitin sa lungsod.
Ayon kay Mayor Domogan, nais niyang maidagdag ang mga nasabing garbage truck bago siya matapos ang kaniyang termino sa susunod na taong 2019.
Samantala, nabanggit din ang issue sa basura at sa kakayahan ng lungsod sa pagkolekta ng basura noong nakaraang grand parades sa pagdiriwang ng Panagbenga 2018. “Malaking trabaho at obligasyon, but sa awa ng Diyos…we were able to manage our waste disposal system, that we were able to dispose the garbage sa proper disposal method.” Gayun din, nagpasalamat ang mayor sa lahat ng volunteers at sa Baguio Bloom street sweepers na nag-ayos at mabilisang naglinis sa mga kalat sa dalawang parada.
“Don’t be part of the problem, but be part of the solution,” giit ng mayor. Aniya, natupad ang matino at mabisang paglinis at waste management system dahil sa kabayanihan na ipinakita ng mamamayan ng lungsod. Naobserbahan din na marami pa rin na mga turista ang nag-iiwan ng kanilang basura sa iba’t ibang lugar. Umaasa si Domogan na sana magawan din ng solusyon ang disiplina, upang sumunod ang mga bisita sa pagtapon ng basura sa tamang lugar. KIRK MATTHEW M. AMANSEC, UB Intern
Panagbenga, ipinagdiwang din sa kulungan
March 2, 2018