Barangay Rangers iti Ilocos Norte, maipaayan ti sueldo

January 11, 2019 Provincial

SIUDAD TI LAOAG – Tapno masigurado ti pannakasalaknib ti aglawlaw kontra ti epekto ti panagbaliw-baliw iti panawen, agtultuloy ti pannakayimplementar ti programa a Barangay Ranger Officers (BRO) iti Ilocos Norte.
Segun kenni Estrella Baby Sacro, agdama nga Environment and Natural Resources Officer (ENRO) iti Ilocos Norte, awanen ti problema ti pannakaipaay ti sueldo dagiti agpapaay a BRO iti probinsia.
“Siraragsak kami a mangipakaamo a maysa ti BRO kadagiti kangrunaan nga inikkan ti probinsia iti pundo babaen iti panangkiddaw ni Gobernador Imee Marcos,” kuna ni Sacro.
Imbatadna nga iti masungad a tawen ket addan ti pundo a nailatang a para ti sueldo dagiti BRO iti panangrugi iti bulan ti Enero.
Mainaig iti daytoy, impeksana ti panagyamanna iti gobierno probinsial gapu ta babaen kadagiti BRO, masigurado ti pannakasalaknib ti aglawlaw ken kabakiran iti naduma-duma nga ili iti Ilocos Norte.
Nayimplementar ti programa a BRO para iti pannakasalluad ti kabanbantayan iti probinsia ken tapno saan a madadael gapu iti ilegal a panagpukan ti kayo ken dadduma pay a pannagdadael ti kabakiran.
Mangnamnama ni Sacro ti panagtultuloy ti nasao a programa iti probinsia gapu ta dakkel ti maitultulongna iti pannakaalay-ay ti epekto ti “climate change,” saan laeng nga iti Ilocos Norte ngem ketdi iti intero a lubong.
CJDG, PIA1-Ilocos Norte/ABN