Binukbok a bagas wenno ulo!

September 10, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan sukimi, ania ngay, namgusto met piman ni Apo Init manu nga aldaw ngem minalem met latta nga ibayakabak wenno yarbisna, awan makunami iti dayta agsipud ta kasapulan tayo met ti todo tapno saan a maatianan dagiti ubbog a kunada.

Iti napalabas adu dagiti intay napagpatangan nangruna ti panagbaliwbaliw ti klima nga uray addatayon iti ber month a kunada. Idi, Kayong, no madanunen ti kastoy a bulan, mangrugin ti angina Amian wenno amihan. Ditoy, malang-abmo metten ti ayamuom ti mangrugin nga agluom a bulong dagiti mabagay a nabalitokanen. Naidumduman ti ganas ti angina ta ipasimudaagna ti dandanin panagapit kadagiti nagrigrigat nga inraep iti napanayam a kataltalonan. Ngem ita, dandani saanen a malang-ab dayta agsipud ta adda pay dita ti gundaway a no kaanu a dandani wenno mabalinen nga apiten wenno gapasen dagiti raep, addayta ti bagyona a mangyaplag iti pagay a pagangayanna, awanen maapit.

Saan tayon a masdaaw ta kastoy ngaruden ti taray ti panawen. Gapu iti global warming, dimteng ti climate change, saan tayonsa a malapdan daytan wenno matengngel ta tangken ulo tayo met, no ania ngamin diay maiparit isu met ti ad-adda nga intay aramiden ken kaaduan kadatayo, awaten wenno aklonen tayo man wenno saan, ti agdama laeng ti intay pampanunoten, saan tayo man laeng a sirmataen ken panunoten ti masakbayan nangruna ti sumarsaruno a kaputotan. Awan ti makuna a vision tayo ngem ketdi, bahala na si batman wenno bahala na bukas, sa inton adda didigra, pabasolen tayo ti Dios. Hay naku makaulaw ka Mildred a kunada hahaha.

Iti naglabas a lawas, Kayong Angkuan nagadu nga isyu, nabukbok ti panunot tayo…ano ba talaga Kuya? Addaka dita a ti pannakatiliw koma ni Senador Trillanes ngem nag-hotel wenno nagboarding idiay Senado. Kunada pay a kasla agtiwel nga aso a taul a taul ngem imbagna ti ipusna, hahaha, unayen ta agtiwel nga ason aya ina. Wen, kasta ti komentaryo ti dadduma nangruna iti social media…no talaga kanu a natured, ilabanna ti kalinteganna iti korte wenno iti legal a wagas saan a ngakngak a ngakngak, presscon ditoy, presscon idiay…ania ngarud ngay ket maayatan met dagiti dadduma a kabsat iti media a ta adda material da.

Ania kadi a talaga ti husto kadagitoy a proseso? Awan makunami ngem agpaliiw tayo latan Kayong. Ta adda kuna ni Chairman Diego kaniak a chairman ti barangay Kupkupiyes, kasta laeng kanu ti biag, ang buhay a wider-wider lang, hahaha, mayatak sa iti dayta a naisawangna. Tay kunada pay, pagsisinnublatan ti isem…mayatka iti nakunak Kayong?

Ala ket sapay la koma ta maurnos da met laeng dayta iti masungad nga aldaw ta datayo a nakukurapay ken gagangay nga umili ti apektado ta imbes a kitaenda koma met no ania ti pamataudan ni Juan dela Cruz iti isaangna, saan ta sabali met ti ar-aramidenda.

Maysa pay a binukbok este isyu kuna tay koma, Kayong Angkuan, isu daytoy panangan iti nabukbok wenno binukbok a bagas. Mabalin kanu latta a kanen sus maria kusina, anai met a panagpampanunot daytan. Kasta kadi lattan ti kinababa ti panagkitkita dagitoy a mokong este tattaon kadatayo. Agpatingga tayo kadi lattan iti nabukbok a bagas? Ania a kita ti panagut-utek daytan, mamatika met a kayatda a kanen dayta? Amangan no dida pay ket mangmangan iti innapoy, a pasig a dagitay agkakangina a makan. Ania ket daytan, ti kadi bagas ti nabukbuk wenno uloda? Agdamdamag kami laeng kaarruba, ania’t makuna yo?

Sus nalpas ti ani, anak ti tukling a balo. Kasta pay kakayong ta ne, overtime tayo manen ket…ala aglisi ka man dita Atong, ania man ta isensenyasmon, anunsio iti hueteng? Agingga ita, dayta pay laeng ti ubram, ala, ala, kalagem ngarud tay opisyal a kasla agtiwel nga aso no ammom ti kalagna. Kasta pay, babayoo, tsup tsup muahmuah.