Empleado ti PGLU, nagsapata manen iti serbisio publiko

September 10, 2018 Headlines

SIUDAD TI SAN FERNANDO, LA UNION – Pinabaro dagiti empleado ti probinsial a gobierno ti sapata dagitoy maipapan iti panangipaay iti serbisio publiko kabayatan ti pannakarambak ti Philippine Civil Service Month iti umuna a flag raising ceremony tatta a bulan a napasamak idi Setiembre 3 iti Provincial Capitol grounds ditoy siudad.
Iti mensahe ni Gov. Francisco Emmanuel “Pacoy” R. Ortega III, impaganetgetna ti kinapateg ti pannakaobserbar ti Civil Service Month, “…our chosen career and vocation, in fact, everything we do in public sector is covered by the Civil Service, a fundamental provision in our constitution.”
Kinuna ti gobernador a ti renewal of oath ket maysa a pammaneknek iti commitment dagiti empleado ti PGLU nga itandudo ken salimetmetan ti constitusion.
Ginutugotna dagiti empleado nga agbalin a pagwanawanan iti kita ti La Union nga ar-arapaapen ti PGLU.
Nabigbig dagiti retirees kabayatan ti programa. Pakairamanan daytoy ni Medical Officer III Edwin Laureta ti Rosario District Hospital, 30 years iti public service; Administrative Assistant II Tessie Gengania ti Human Resource Management Unit, 30 years a nagserbi; Laboratory Technician II Florencia Munar ti Provincial Engineering Office, 39 years; ken Population Program Worker II Sonia Caldito ti Provincial Population Office, 41 years public service.
Kabayatanna, segun iti gobernador, maobserbaran dagiti dadduma pay nga aktibidad iti bulan ti Setiembre kas ti Clean-up Month, National Tuberculosis Month, National Crime Prevention Week, Linggo ng Kasuotang Pilipino, National Tourism Week, National History Week, Philippine Councilors League Week, ken National Family Day. Camille R. Bumatay, PITO-LU / ABN