Hay naku aya, biag a kaskasla takiag, Part 3

July 7, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN…adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Sakbay man ti amin, kabarangayan, kailian kakayong me ida, adtoy man ti maysa a pagraray-awan tayo.  

Idi naglibas a pimmanaw ti katulong da Chairman Gusting…

Sofing: Nasayaat ta addkan, Gusting lakay.

Gusting: Apay? Ania ti parikut?

Sofing: Ni Pitang a katulong ta ah, pimmanaw a di nagpakada ket ti makadakes, innalana dagiti       tualia ta.

Gusting: Naglokon, talaga nga adu itan ti katulong nga awan sursurona ken bastos, awan panagbabainda. Amoda lokuenda.

Sofing: Isu ngarud, a…adun ti manloloko.

Gusting: Ngem mabiit man laeng, ania a tualia ti innalana, amangan no dagiti pay agkkapintas.

Sofing: Talaga, ah, dagitay adda markana nga Amianan Hotel kas kada Nagyon Inn, ken ania pay dagidiay.

Gusting: Ay, nang…!

Di wowww, hahahaa, anak ti tukling a balo… nangalaam ngay kadagidiay Mang Gusting? Hahahaha?

Kas intay inkari iti napalabas a kolum tayo kakayong, talantanen tayo man ti sagudayen ti linteg maipapan iti pannakaisubli ti organic farming iti pagilian. Daytoy a linteg ket napirmaan pay laeng idi tawen 2010 babaen ti pasado a president a ni Ex-president Gloria Macapagal Arroyo. Sagudayen ti nasao a linteg, napusgan dagiti LGU wenno local government unit a mangi-promote iti Organic Farming wenno organiko a panagtalon, wenno ti makunkuna a nainsigudan a panagtalon. Ngem ti nakas-ang, manmanu wenno mabilang pay laeng kadagiti ramay ti nangipaulog wenno nangipromote iti daytoy. Nakas-ang unay a panunoten.

Kas intay met maim-imatangan ken mapalpaliiw, dakkelen ti nagbaliwan ti panawen ken paniempona ket segun kadagiti managsukisok dakkel ti paset ti makuna nga air pollution a gapu ti ibabara ti panawen malaksid kadagiti dadduma pay a rason, ngem maysa a rason ti air pollution no di man kangrunaan a rason ti global warming. Ngem ania koma ti pakainaigan wenno pakairamramanan ti makuna a chemical farming kunayo seguro kailian a mannalon ken kakayong. Diyo kadi ammo a ti nalabesen wenno sobran a panagaramat tayo kadagiti pestisidio wenno sabidong a pangkontrol kadagiti peste ket dakkel daytan a rason?

Malaksid iti pannakasabidong ti angin ken aglawlaw, adu ti dalapusenna nga ultimo dagiti makuna a good bacteria agingga iti friendly insect ken dadduma pay ket mairamrmaan, malaksid a mapukpukawen ti dam-eg ti daga ta matayen dagiti microorganism iti daga a mangtultulong tapno dumameg ti daga, in-inut payen a masabsabidongan ti danum nga inumen tayo nga agtaud iti ubbog iti uneg ti daga ta in-inut met a sagsagepsepen ti daga daytoy a sabidong. Kangrunaan ti amin, maysa a kinaranggas ti intay panangsabidong it Ina daga nga isu’t pagtataudan ti taraon tayo. Mamati kayo wenno saan?

Ken ti maysa pay a gapuna no apay a dida basta mayimplemtar ti organic farming kas sagudayen ti RA 10068 wenno Organic Law of the Philippines ket ti makuna a profit wenno ganansia kas kada big taxes wenno dakkel a buis a sumrek iti lakasa ti gobierno. Ala kakayong ko ida, awisen dakayo a mangbasa manen iti sumaruno nga isyu ti ABN ta ituloytayo nga ibingay kadakayo ti bassit nga ammomi maipapan iti makuna a disadvantage ken advantage daytoy intay taltalantanen.

Ala ngaruden, kasta pay kakayong ta ne overtime tayo manen… babayoo, tsup tsup muahmuah.