Joint maritime training ti PH-US Navies maisayangkat iti LU, Hulio 9-14

June 30, 2018 Headlines

SIUDAD TI SAN FERNANDO, LA UNION – Inwaragawag ti Naval Forces Northern Luzon (NFNL) a maisayangkat ti Maritime Training Activity (MTA) Sama Sama 2018 iti probinsia ti La Union manipud Hulio 9 inggana 14, 2018.
Ti nakuna a panagsanay ket tinawen nga maipatpatungpal iti nagbaetan ti Philippine Navy ken United States Navy.
Iti command briefing ti Philippine Navy nga inatendaran ni Gov. Francisco Emmanuel “Pacoy” R. Ortega III idi Hunio 26 iti Naval Station Ernesto Ogbinar, Poro Point, City of San Fernando, inparang ti NFNL ti overview dagiti aktibidad ti MTA Sama Sama 2018.
Ni Gobernador Pacoy, kas guest of honor and speaker, ket naikkan ti arrival of honor iti headquarters nga indaulo ni NFNL head Commodore Nichols Driz.
Iti mensahe ti gobernador, nagyaman daytoy a napili ti La Union kas lugar ti maritime training, “I am deeply honored knowing that La Union shall have its contribution in strengthening your operations at sea and ashore as well as in solidifying your maritime operation.”
Naammuan a ti MTA ket pakipasetan ti agarup 800 navies ti US ken innem nga observers manipud Japan Maritime Self-Defense Force. Amin a subject matter expert exchanges, class discussions, seminars, lectures ken practicals ket maisayangkat iti headquarters kabayatan a dagiti community relations projects ket maaramid kadagiti nabigbig a luglugar ditoy siudad.
Impanamnama ni Gobernador Pacoy ti suporta ken pannakipaset ti probinsial a gobierno ti La Union kadagiti nakuna nga aktibidad.
Dimmar-ay met iti briefing ni ABONO Party-list Representative Vini Nola Ortega a nangipanamnama iti suportana, “In congress, if you want my help especially Philippine Navy, I will be your champion.”
Gandat ti MTA Sama Sama a maipangato ti complexity ken diversity ti panagsanay ti navy kabayatan ti panangpapigsa iti aliansa ti Pilipinas ken US. C.BUMATAY, PITO-LU / ABN