Mayor, kadwana a pulis ken driver, napapatay iti La Union

October 8, 2018 Headlines

CAMP BGEN OSCAR M FLORENDO – Natay ti maysa a mayor ken ti kadwana a pulis ken drayber bayat a nasugatan ti maysa a bise mayor idi pinalpaltugan dagitoy dagiti saan pay a nabigbig a suspek idi rabii ti Oktubre 1, 2018 iti Bangar-Castro provincial road, Barangay Cadapli, Bangar, La Union.
Binigbig ni Senior Superintendent Herminio S. Tadeo Jr., officer-in-charge ti Police Regional Office 1 (PRO1), dagiti biktima kas Alexander Oliva Buquing, municipal mayor ti Sudipen, ken ti asawana a ni Wendy Joy Dingayan Buquing, municipal vice-mayor ti Sudipen; Boni Bacate Depdepen, drayber, residente amin ti Barangay Castro, Sudipen, La Union; ken ni PO2 Rolando Cayat Juanbe, pulis a nakadestino iti Sudipen Police Station.
Segun kenni Tadeo, mapattapatta a 6:40 iti rabii, imanmaneho ni Depdepen ti Toyota Hilux a nakaluganan dagiti amin a biktima idi pinalpaltugan dagitoy dagiti suspek a nakalugan iti puraw nga pick-up manipud iti likudan ti nagluganan dagiti biktima.
Dagus a naitaray iti Ilocos Sur District Hospital iti Tagudin ni Mayor Buquing ken PO2 Juanbe ngem naideklara a dead on arrival dagiti biktima.
Kabayatanna, naitaray iti Lorma Medical Center, San Fernando City, La Union da Depdepen ken Vice Mayor Buquing ngem saanen a nakadanun a nabiag iti ospital ni Depdepen. Iti agdama, maag-agasan ni Vice-Mayor Buquing iti nasao nga ospital.
Inbilin ni Tadeo iti Bangar Police Station nga aramidenda ti kabaelanda tapno masolbar a dagus ti krimen ken mabigbig dagiti suspek ken ti makinkukua iti inusarda a lugan.
Nabukel ti maysa nga special investigation task group nga idadauloan ni PSSupt. Ricardo G. Layug Jr., provincial director ti La Union PPO, ken imatunan ni PSSupt. Adolfo Samala, deputy regional director for operations, para iti nadardaras nga imbestigasion ti nasao a krimen. ABN