Naannayas a Palarong Pambansa 2018, naisaganan

April 8, 2018 Headlines

SIUDAD TI SAN FERNANDO, LA UNION – Impatalged ti Department of Education-Region I ti natalna ken naurnos a panangisayangkat ti Palarong Pambansa iti probinsia ti Ilocos Sur inton Abril 15 inggana 21, 2018.
Manamnama a 13,000 delegado manipud iti 17 a rehion iti pagilian ti makipaset iti Palaro.
Kinuna ni General Athletic Manager Edilberto R. Abalos, chief iti Education Support Services Division (ESSD) ti DepEd-R1, nga dagiti regional offices, 14 schools division offices (SDOs), ken ti probinsial a gobierno ti Ilocos Sur (PGIS) ket nagsaganan tapno masigurado a naurnos ti taray ti trapiko, natalged dagiti pasdek dagiti ay-ayam ken pagdagusan dagiti delegado, adda umdas a mausar a danum, ken naasintar dagiti electrical installations nga agpaay iti tunggal delegasion.
Makaanay metten dagiti medical personnel manipud regional ken division offices ken kadagiti local government units a nabunggoy tapno mangkita iti salun-at dagiti atleta iti kasanguanan, kabayatan ken kalpasan ti tunggal ay-ayam. Isuda ti nakasagana a mangted iti first aid nu adda agkasapulan.
“A roving medical team was organized in addition to the health personnel deployed in each billeting center and playing venues. They will provide for an immediate medical assistance if it is needed,” kuna ni Abalos.
Dagiti billeting schools ken playing venues ket adda iti nagduduma a pasdek iti Vigan City, dagiti munisipio ti Bantay, Caoayan, Santa, Santo Domingo, San Ildefonso, ken Santa Maria, Ilocos Sur. Maikabil dagiti tarpaulins ken karatula tapno maliklikan a mariro dagiti atleta nangruna kadagiti one-way road.
Nangbukel ti Region I ken PGIS kadagiti working committees a tumulong iti panangmanehar iti Palaro. Pakairamanan daytoy ti committee on opening program, closing program; committee on parade; public order, security and safety; awards and ceremonies; physical set-up; stage preparation and backdrop; accommodation and billeting quarters; playing venues; food services; health and sanitation; ken committee on governors’ and mayors’ night.
Ni Provincial Governor Ryan Luis V. Singson ti Ilocos Sur ti agserbi kas honorary chairperson ti Region 1 Athletic Association (R1AA) delegation officials. Ni Regional Director Dr. Alma Ruby C. Torio ti DepEd-R1 ti mangidaulo iti R1AA delegation. Nasurok 800 ti delegado ti Region 1.
Ti parada dagiti atleta a mapan iti Quirino Stadium iti Bantay, Ilocos Sur ti senial ti panglukat a programa iti Abril 15. C.S.BUCSIT, DepEd Region 1 / ABN