Pinnabasol

August 20, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna. Nepnep wenno layos kadi pay la dita luglugar yo, kaasi ti Apo ket sumirsirip metten ni Apo Init ditoy batugmi.

Sakbay man pay kakailian, Kayong Angkuan, nga intay ituloy ti manglukais kadagiti nababara nga isyu ita ket rayray-awen tayo man pay ti bagbagitayo. Iti naminsan, naladaw ni Budoy iti klasena, sinitar ti teacher-na ket…

Teacher: Budoy, apay a late ka manen?

Budoy: Late ngamin toy relok, ma’am.

Teacher: Eh, di i-advance mo…

[Bigla a rimuar ni Budoy-]

Teacher: Apay Budoy, papanam ta rumuarka metten?

Budoy: Agawidakon ah, ma’am…ket no time-men iti relok.

Nalpas ti puli…anak ti tukling a balo!

It kallabes, topiko tayo ti maipapan ti NFA, ti kanu kinakurang ti supply ken ania pay dita. Ngem sakbay a suraten tayo daytoy a kolum tayo, nadamagmi nga adu ti nagsangpet a bagas ngem adda pay laeng iti pier. Isu a kidkiddawenda nga i-priority da nga isanglad dagidiay. Ala, sapay la koma ta pudno nga awanen parikut iti bagas ta dayta ti kangrunaan a taraon ni Pinoy. Ngem, adda manen dagiti agkunkuna, amangan no makaun-una manen dagitay komersiante iti bagas nga asideg iti dalikan ket isuda ti makaadu sada manen ilaok iti komersial a bagas…anak ti tukling a balo!

Apay ngata nga adu kadatayo a Pinoy ti sobra ti sikapna nangruna no maipapan iti pagbaknangan wenno maipapan iti sanikua? Ditay met maisurot dayta inton datayo ti agurnos sakana. Saan a balen nga adda dagiti maperhuisio tayo a tao, saan a bale nga agbasol tayo, magun-od tayo laengen ti kalkalikaguman tayo? Saan a bale koma a bumaknangka no babaen iti panagsaldetmo, babaen iti nadalus a wagas…ket ammom kayong Angkuan ania, uray kunada nga awan adalna, a di nakalpas nga abogado wenno ania pay dita, adayo a dayawek ni Senador Manny Paquiao ta bimmaknang babaen iti makuna a nagling-etanna…nga ipuspustana pay ti karadkadna. Nalaka aya ti makipinnarpar iti rupa iti lona, no kasta ti ibabaknang, awan makuna wenno madillawmi. Saan ket a kas kadagiti dadduma, puera delos buenos a kunada…adu ti aglaplapusanan ngem nagtaud met iti narugit a wagas.

Adu kayong Angkuan ti isyu ita iti pagilian tayo, makapasuron ken makapaluksaw ta ti pakasuronan tayo, agpipinnabasolda. Ultimo ti ar-aramiden ti Presidente, nga uray pagimbagan ni Juan Dela Cruz, kontraen ken dillawenda latta. Imbes koma a tulongan tayo kadagiti napintas a ganuat ken planona tapno rumang-ay tayo metten. Iwaksi tayo koman ti nakaro a pinnulitika kailian, saan aya a kasta ti rumbeng, Kayong Angkuan?

Agburek ti royal blood tayo kadagitoy a mapaspasamak, saanak a maka-Duterte wenno dilawan a kunada ngem timtimbangen tayo met dagiti napipintas a nagapuananen ti agdama nga administrasion ken dagiti ganuat ken planoda ket napintas met. No adda man dagiti makuna a palpak, aramid dagiti makuna nga alipurisna. Ket kas makita tayo met, adun ti dinistugawna ta naduktalanda nga adda nasabeng nga armidna nga agpapan taona wenno mismo nga isu met laneg ti nangipatugaw. Ay, ina aya, dayta ket ti madi kadatayo, naglaing tayo nga agitodo ngem dimo kadi ammo a madi dayta. Madi ti agitodo ta no nagitodoka, maysa laeng a ramay ti panangitidom ket ti uppat a ramaymo, mismo a nakatodo kenka…get’s mo Kayong Angkuan?

Sus nalpas ti ani…anak ti tukling a balo! Kasta pay kakayong ta ne… nakaadu tayo manen. Babayoo, tsup tsup muahmuah.