Pinniltak latta?

April 15, 2019 Opinion Sirmata ken Tagtagainep ni Mang Gusting

Naimbag nga agsapa, aldaw, malem wenno rabii kadakayo amin kabaranggayan, kakayong, gagayyem ken saan nga amammo.

Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo.

Kumusta kayo metten Kakayong? Sakbay man nga intay rugyan daytoy kolum tayo, awan kadi’t nadlaw yo kakaaruba? Dandani metten minalem nga agtudo wenno agarbis ditoy siudad dagiti saleng.

Apay ngatan a kastoy ti tiempona? Awan met bagyo na iti sabali a lugar. Ngem nakaskasdaaw ti kastoy a mapaspasaran mi ita ditoy siudad dagiti saleng.

Sabagay, semana santa inton bigaten wenno Domingo Ramos a kunada. Kaaduan a paliiw tayo, agtudo wenno agarbis iti bisperas daytoy nga aldaw wenno mismo nga iti aldaw ti domingo ramos.

Ket apan man a malpas ti semanata santa, intay mapasaranen ti kunada nga umuna a todo iti bulan ti Mayo.

Kumusta metten ti kampania dita luglugaryo Apo a mangiturturong? Awan met laeng ti pinniltak wenno dinnadael kadagiti kandidato? Kas sigud a araramid, adu ti kasta.

Imbes koma a ti plataporma da a makuna ti mapanda ibunyag, ti met madillaw da ket iti pada da a kandidato. Ammo tayon kailian no asino ti ibotos tayo.

Ditoy batug mi a langit, napaliiw tayo a natalna ken naurnos ti kampania. Dayta laeng ta iti mismo a purok mi, adu ti nakasakas a campaign posters wenno tarpaulin dagiti kandidato ta tangken ulo met dagiti pasurot.

Uray sadinno ditan mapanda met ngamin pagibitinan. Uray alad ti akinalad a dida ipakada.

Adda met ti makuna a designated posting area. Eye sore kuna ti dadduma. Naimbag no makipagikkat danto no malpas ti election.

Nungka a mapasamak dayta nangruna no naabak ti kandidato da.

Ala saludoak iti Comelec iti dayta nga inaramid da ditoy barangay mi. Kasta a, no maiparit wenno bawal, ipatungpal ti linteg. Di nagmayat a kitaen ta husto diay kuna ti maysa a pilosopo a kaarrubak.

Agtrabaho met a dagita adda iti Comelec ta ita laeng nga agtrabahoda kunana.

Maysa kadagiti concern ita ti awtoridad ken Comelec ket ti panangisigurado dagitoy iti naurnos ken natalna nga election inton Mayo, nangruna kadagiti makuna a nariribuk a lugar a no sadino ket adda pinnatayan, ballot snatching ken ania pay dita. Nasayaat la unay dayta.

Dagiti met dadduma a lugar, adda tay kunada a mapirmaan a covenant wenno panagkari dagiti kandidato para iti naurnos ken natalna nga election iti lugar da.

Napintas la unay daytoy, Kayong Angkuan. Magustuak dayta. Sabagay dayta ti maipagpannakkel ko ditoy batugmi a langit ta sipud addaak ditoy siudad ti saleng, diak pay napuotan nga adda pinnatay wenno ania pay dita.

Adda la daydi election, adu met ketdin a tawen ti napalabas a no sadino ket dinisnog ta ububing a kandidato tay padana a kandidato kalpasan ti interview da iti radio. What a life.

Ti maudi nga inkam maibalakad, kakayong, kaarruba, adda kadatayo met laeng ti panagrang-ay ti ili tayo.

Saan tayon nga ipalubos nga agtuok tayo manen iti tallo tawen gapu iti intay panangilako, este panagbiddut a nangibotos iti mangi-lider kadatayo.

Uray kasanu’t kinanumo na wenno kinababa na no la ketdi ta isu’t mapusuan tayo a maikari. Napakumbaba ken maka-Dios, maka-kalikasan a kunada, ken isu ti talaga a maikari, isu’t ikur-it tayo.

Saan tayo nga ibotos dagiti nalaing a mangdadael iti pada da a kandidato. Ala Kakayong, kasta pay ta naimasan tayo manen. Babayoooo, tsuptsup, muahmuahh.