Problema sa daigdig…. Parang bumibigat!

March 7, 2022 Daplis Walang Mintis

Nang magsimula ang tensiyon sa pagitan ng Ukrain at Russia….di pa gaanong pansin ng sandaigdigan. Habang bumibigat ang tensiyon… medyo nakikiramdam na ang mundo.…lalo na sa mga malalapit na lugal dito. Hanggang sa nagbombahan na at marami na ang nasasawi (higit na sa limang daang katao)….lalong tumindi ang pangamba na baga mitsa na ito ng mas malawakang giyera sa parting ito ng mundo.

Di kaila na ang mga kaalyado ng mga sangkot na bansa ay may kanya-kanya ring pagkilos at paghahanda. At kung di mapahupa ang tensiyon, tiyak na malakihang tensiyon ang ibubunga.

Dalangin ng marami: huwag naman sana. Di pa maalis sa ating diwa nang pumutok ang ikalawang digmaan sa mundo kung saan, sa ang ating bansa sa mga binagsakan ng malaking problema. Sa giyera ng Amerika at bansang Hapon…hirap bilangin ang mga kababayan nating nasawi.

Diyan na lamang sa Battle of Manila na tinaguriang isa sa pinakamalaking giyera sa kasaysayan ng WWII…higit sa isang daang Pilipino ang nasawi. Halos madurog ang buong Kamaynilaan. Grabe ang upakan ng mga tropa ng Amerika at Hapones. Ang naipit—tayong mga Pilipino.

Mapait na nakaraan. Di na dapat maulit, ika nga, ng nakararaming naging saksi sa digmaan. Ngunit para sa mga di nakaranas, parang walang lamat ang hirap nating dinanas.

Sa mga di alam kung ano ang tunay na katuturan ng isang digmaan….sisiw lang sa kanila ang mga ulat ng upakan ng tropa at tumabahan ng lahi. Buti pa ang mga sinaunang digmaan kung saan sa dulo lang ng kampilan at mumunting pumuputok na armas ang gamit.

Di gaya ngayon na sa isang pindot lang, tunaw na ang isang isla. May giyera ang daigdig dahil sa pandemyang dala ni Covid-19. Idagdag mo pa ang mga tensiyong gaya sa nagaganap sa pagitan ng Ukrain at Russia.

Kung ang tensiyon ay mauuwi sa malawakang digmaan, ano kaya ang hinaharap ng ating daigdig? Sa pamamagitan ng mga makabagong sandata ng bawa’t bansa at high-tech na estilo ng pakikibaka…ano kaya ang kahahantungan ng ating mga salinlahi sa daigdig?

Kung ating babalikan ang mga kasaysayan ng mga alitan ng mundo ….halos ubusan din ng lahi ang mga pangyayari.

Naghahari ang mga malalakas at api ang mga mahihinang bansa. At dahil sa mga hidwaan, may tapik ang ating Poon na kaya

Niyang gunawin ang mundo upang magkaisa lamang tayo. Tanong: hindi kaya ang mga pangyayari sa ngayon ay isang senyales na at paunang tapik ng Poon na dapat magkaisa lahat ang mga lahi sa sansinuklob?

Di kaya ito ay pahimakas na nalalapit na tayo sa tinatawag nilang Wakas Ng Daigdig? Di kaya ang Pandemyang nagaganap at kaguluhan ay mga senyales ng nalalapit ng Hagupit ng Poon sa lahat ng nilalang?

Ayon sa obserbasyon sa mga nagaganap na tensiyon ngayon sa pagitan ng Russia at Ukraine…..hindi malayo ang mapanganib na delubyo.

Kung hindi magkaisa sa mapayapang paraan ang mga malalaki at maaunlad na bansa at sasakyan ang nagaganap na tensiyon sa panig na ito ng mundo…may katiyakan ang mga observers na maaring magaganap ang ikatlong pandaigdigang giyera. Huwag naman sana. Idaan na lang sana sa matiyaga at diplomasyang usapan.

Huwag na sanang palalain ang baga na maging apoy o sunog dahil marami ang madadawit na buhay. Huwag naman sanang gamitin ang kanilang makabagong teknolohiya sa ikasisira ng daigdig.

Magkaisa na sana para sa mas maunlad at tahimik na mundo nang walang magbubuwis ng dugo at buhay. Sa ngalan ng pagkakaisa…dalangin ng espasyong ito na sana’y humupa na ang tensiyon at pandemya tungo sa mas tahimik at maunlad na bukas para sa salinlahi ng mundong ating minana sa Poong Maylikha. Adios mi amor, ciao, mabalos.