Shawarma Festival

March 10, 2019 Opinion Sirmata ken Tagtagainep ni Mang Gusting

Naimbag nga agsapa, aldaw, malem wenno rabii kadakayo amin kabarangayan, kakayong, gagayyem ken saan nga amammo.

Suimangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo. Kumusta kayo metten Kakayong?

Kayong Angkuan, nakadanun ka kadin ditoy Baguio nga immay naki- Shawarma Festival este Flower festival kunak koma?

Kadagiti immune-una idi a session in bloom, adu ti magatang wenno naka-display a nagduduma a klase ti nagpipintas a sabong.

Iti inkam panagpasyar naming ita, sus maria kusina, pakanan met ti adu kas kada pagtonuan iti bbq ken shawarma met.

Nupay adda met dagiti pagtagilakuan ti makunkuna nga OTOP wenno one town own product, dagiti nagduduma a produkto ti nagduduma nga ili a maipromote.

Kasta koma ti rumbeng kangruanan ti amin, nagduduma koma a klase ti sabong.

Kas intay panagpaliiw, adda met dagiti paset a napusek ti puesto ket dandani saan a makalasat ti tao ket ditoy no maminsan ti pakapasamakan ti panagdukot.

Kas intay pay napaliiw, kasla nga awan sa ti booth dagiti kakabsat a kameng ti nailian a kapulisan.

Agngudo ti session in bloom ken makuna a Panagbenga nu rabiin, kayong ngem medyo nadismayan a talaga ta ti maysa a gagarak ket awan met.

Gumatangak koma kadagiti citrus a maimula, dagitay marcotted a lemon, kalamansi ken ania pay dita a maimula iti arubayan a di unay rumangpaya.

Adda met dagitay nagduduma a lako a handicraft ket mayat ngem no dagitay kawes a bargain kasla met dagitay naggapu idiay divisoria!

Idiay met makuna nga ayan ti market encounter, adu met idiay sentro ti Baguio. Ti laeng makaay-ayo idiay a paset ket ti makuna a Landscape.

Adu ti nagpipintas, nagduduma a desenyo ti landscape a mabalin mo nga iapply iti arubayam ngem, sus maria kusina, kayong, sigurado la ketdi a nangina!

Sakbay man a gibusak daytoy kolum tayo ita, adda man madamag tayo. Apay ngata a bassit ita ti puesto dagiti aglako iti sabong wenno dagitay mula nga agsabong?

Adda met nakitami ngem maymaysa laeng a pweston sa a paglakuan iti orkidia. Saan a kas iti napalabas, nagpipintas ken nagduduma a klase ti sabong coma.

No para kanyak, kayong, mas nakaay-ayo a kitaen dagiti makuna a natural, ngem ala, anya man ti rason no apay a bassit ti naglako wenno nagidisplay iti lakona?

Agpatingga laeng iti saludsod. Maysa pay, kayong. Naiserra ti session road iti makalawas, ket nagpintas ti magna nga agpangatoagpababa ta awan lugan ken saan a naasuk.

Awan asuk ti lugan. Nupay adda asuk dagiti nagduduma a paglakuan iti makan kas intay nadakamat.

No la koma agnanayon a mai-serra nga uray ti laeng agpangato iti session tapno saan unay a naasok, kas kadagiti dadduma a dadakkel a siudad iti lubong, awan mapalubosan a lugan a lumasat.

Nagwaya dagiti tattao a magmagna ken adda pay dagiti siudad a no sadino ket kalapati ti adda iti parke iti sentro ti siudad, nagmayaten a sirmataen ken tagtagainepen ti kasta koma a mapasamak ditoy siudad ti Baguio.

Imbes nga asuk manipud iti tambotso dagiti lugan ket palayopoy a no sadino ket angot pine tree ti inka malangab. Ala, kakayong, kasta pay ta naimasan tayo manen.

Amangan no sabatennak manen iti binalsig ni Sofing. Babayoooo tsuptsup, muah.