Suspek ti murder iti Abra, napapatay iti Ilocos Sur

July 14, 2018 Headlines

SIUDAD TI BAGUIO – Maysa a construction worker a naisaklang iti kaso a murder iti Abra ti napalpaltugan inggana natay iti Caoayan, Ilocos Sur idi agsapa ti Hulio 11.
Dagus a natay ni Emi Millare Rapisura, 36, manipud Lagangilang, Abra, gapu iti pito a tama ti bala iti ulo ken bagi daytoy.
Segun iti report, nakalugan ni Rapisura iti maysa a tricycle iti barangay Pandan, Caoayan idi pinalpaltugan daytoy ti armado a lallaki a nakaabungot ti rupada ken nakasakay iti motorsiklo.
Nakita dagiti otoridad ti walo a basyo ti bala ti pistola a kalibre 45 ken maysa a deformed slug ti nakuna met laeng a paltog.
Natakwatan dagiti pulis nga awan ti dakes a rekord ni Rapisura iti Caoayan ngem addaan daytoy ti kaso a murder iti ili a naggapuanna. Immakar daytoy ti paggianan kalpasan a nagbayad ti piansa idi Setiembre 2017 gapu iti butengna a balsenda isuna.
Inaklon ti live-in partner ni Rapisura a ni Erlyn Pablico kadagiti otoridad a saanen a napnapan ni Rapisura kadagiti court hearings iti Abra gapu iti amakna nga agpeggad ti biagna. A.ALEGRE / ABN