Tulong ti gobyerno naited para iti pamilia ti OFW a natay sadiay Singapore

January 13, 2020 Headlines

SIUDAD TI SAN FERNANDO, La Union – Nangted iti tulong dagiti ahensia ti gobyerno ti Rehion 1 kadagiti aglaldladinget a pamilia ni Arlyn P. Nucos, maysa a natay nga Overseas Filipino Workers (OFW) iti maysa nga disgrasya iti lugan iti ruar ti Lucky Plaza shopping center idiay Singapore.

Ni Nucos nga taga-Barangay Carlos sadiay Caba, La union ket nagtrabaho a kas domestic helper iti las-ud 30 tawen. Idi Enero 3 ket impaima iti Overseas Workers Welfare Administration (OWWA) ti Ilocos Region iti death ken burial assistance nga aggatad PhP220,000 kenni Reynaldo P. Nucos ken Alice P. Nucos-Austria, pamilia ti biktima.

“Kas maysa a miembro ti OWWA iti oras nga dimapakadaan nga pannakatay, karebbengan iti pamilia ni Arlyn nga makaala iti social benefits nga adda umuna a gatad PhP220,000,” kuna ni Geraldine Lucero labor communication officer ti OWWA-1.

Iti nasao nga gatad, PhP200,000 iti death insurance bayat nga PhP20,000 ket iti burial assistance. Sakbay nga naited iti social benefits para iti pamilia Nucos, bimmisita dagiti pannakabagi iti OWWA-1 tapno maipakita iti suporta ken simpatiada kalpasan iti nakumpirma nga insidente.

“Iti dagus a panagbisita ket panggep met nga maitulod iti kaudian nga damag para iti pannakaiyawid iti bangkay iti kabsatda nga ni Arlyn,” kuna ni Lucero. Idi Enero 1 ket kadwa met dagiti pamilia ni Nucos ni OWWA Administrator Hans Leo J. Cacdac ken opisiales ti OWWA-1 nga simmabat iti bangkay ni Arlyn idiay Clark International Airport sadiay Mabalacat, Pampanga.

Maysa pay, iti Department of Social Welfare and Development (DSWD) Field Office 1 ket nangted met iti tulong pinansial para iti pamilia ti biktima nga PhP10,000 ken innem a family food packs. Iti tulong pinansial ket naited babaen iti International Social Services Office ti DSWD.

Maysa a psychosocial processing wenno stress debriefing iti naikondukta met para iti pamilia lalo iti ipag daytoy nga kimmuyog nga maisubli iti bangkay ni Nucos ditoy Pilipinas. Dagiti kaanakan nga agpampannuray iti suporta manipud iti biktima tapno maiutloyda iti kolehio ket mairekomenda iti probision iti educational assistance.

Iti DSWD katulong iti Local Government ti Caba ket impasiguradoda iti sabali pay a suporta nga serbisyo ket maited iti pamilia. Kabayatanna, ni Araceli P. Nucos, bakbaket a kabsat ken maysa met nga OFW nga adda iti “critical condition”kalpasan iti aksidente ket dimmalan iti umuna nga operasion ti nadangran a sakana.

Madama nga naadmitar daytoy iti maysa nga ospital idiay Singapore ket kanayon iti kominikasion iti pamiliana kenkuana.

JND-PIA-LU/PMCJr.-ABN