Unayen Ama, anian a bara na!

April 22, 2017 Opinion Sirmata ken Tagtagainep ni Mang Gusting

Yahooo, yahoooo! Naimbag nga oras kadatayo amin kakailian. Buenos dias, buenas tardes, halo halo, opssss, nagdagaang ti panawen kailian naimas ti halo-halo. Naimbag nga aldaw, malem ken rabii tayo amin depende iti inkay panangbasbasa iti daytoy pagiwarnak tayo ken kolum tayo. Kumusta metten ti biag tayo Kayong Angkuan, Ikit juana, agpa-halo-halo ka ngaruden a ta ni kasta unayen a bara ti panawenna. Uray la agling-eten ti amin a maliplipit, unay a baranan ama.

Kalgaw la nga agpayson ngem sus maria kusina aya, apay a kastoy metten ditoy batugmi a langit. Agasem dayta, kalgaw ta bulan pay laeng ti Abril ngem dandani minalem metten nga agtodo Kayong. Talaga a narigaten a pogtuan ti panawenna. Epekto kadi a talagan daytoy ti global warming nga agtinnag iti climate change? Isu a dakayo Kayong Angkuan, Ikit Juana, isaganayon dagitay sungrod yo ta dikay to ket agkamata no bigla lattan nga agnepnep ket awan pay nakasagana a sungrod yo. No malagip tayo manen ti kinaranggas ti pada a tao iti nakaparsuaan nga isu ti kangrunaan a factor ken gapu daytoy ibabaran ti lubong ken panagbaliw ti panawenna. Ngumato ti presyon ti royal blod tayo ta saan a kastoy ti sirmata tayo. Saan a kastoy ti tagtagainep tayo idi a pagbanagan koma ti lubong nangruna ditoy nakayanakan tayo a paset ti lubong. Nagngayed pay laeng idi ti aglawlaw ta adu ti mihoras wenno dagitay agbunga a kayo wenno muyong kadagiti ar-arubayan. Kas met laeng ditoy nakaisadsadan tayo a paset ti ina daga, Kayong. Idi kasangsangbay ko iti daytoy a lugar, naglammin, nagmayat ti klimana, saan a pagpasaw. Tay nakabotelya a danum nga ikabilmo laeng iti rabaw ti lamisaan no iti bigat, sus kasla naggapu iti refrigerator kunam sa. Ngem itan, awanen. Unayen, anian a bara ti panawen nga agpapan ditoy ibagbagada a summer capital of the Philippines. Kasano met ngamin aya, dandani awanen makitam a nakatakder a puon ti pine tree ta kasla metten nagtubo nga uong dagiti babbalay.
Isu a nakas-ang a panunoten a tao met laeng ti nangdadael iti kinangayed ti aglawlaw.

Isu a no kastoy man ti panawen nga intay paspasaren ita, sadino man a paset ti lubong ti ayanmo, ammomon ti gapuna ket amin tayo adda pasetna iti pannakadadael ti klima. Saanka a makalisi ta dayta laengen asuk nga ipugso ta motorsiklom dakkelen a factor dayta. Ket saanka met a makalisi dita ina Juana, adda met pasetmo iti panagbara ti panawen gapu ta kanayonmo a puoran dagit naregreg a bulbulong ta salamagi ken starapple nga adda dita arubayanyo. Dayta asuk ti puor mo ket dakkel ti maipaaynan a madi iti aglawlaw. Isu a ti aramidem, urnongem dagita a bulbulong ket urnongem dita puonda met laeng ta malungsot nga isu met laeng ti taraonna wenno ganaganna. Sus maria kusina ka ketdi, saan a rugit dagita, ti makuna a rugit ket isu ti panagkusit ken panagkurakut este sus apo apay a nagturong manen dita aya. Ngumatonto man la ngatan ti presyon ti royal blood tayo a makalagip iti kinakurakot dagiti sinalbag nga agtuturay. Apay manen nga ag-HB ka kunam Kayong? Kasanu a dika ag-high blood met ket malagipko manen ti nabasa tayo manen a damag idi a nagpamula kanu ti maysa nga agensia iti seedlings ti kayo ngem panawen metten ti kalgaw, pes-ay ina, makasao tayo iti espansyol este dakes no kastoy latta ti mapaspasamak.

Alla, overtime ta manen este naimasanta manen ti naginnistorya, kayong, panawanka pay ta ne narigaten amangan no ag-HB manen ni Sofing ket umaynakto man suroten iti binalsig. Kasta pay, babayoooo, tsuptsup muahmuahhh.