ILOCOS SUR, NORTE, PINALAG-ANDA ITI TRAVEL PROTOCOLS PARA KADAGITI NAAN-ANAY A BAKUNADO

November 20, 2021 Headlines

SIUDAD TI ILOCOS – Dagiti tattao a naanaayen a nabakunaan ket saandan kasapulan a maipasidong iti test wenno quarantine nu agbiaheda ti Ilocos Sur iti uneg ti kurang pay a 24 oras.
Pinasengkeddan daytoy ni Dr. Trina Talaga, chief of the Ilocos Sur Provincial Hospital iti maysa nga interbiu iti radio idi Lunes (Nobyembre 15) kalpasan iti agtultuloy a panagbaba iti kaskaso ti coronavirus disease 2019 (Covid-19) iti probinsia.
“Kas pagarigan, dagiti naan-anayen a nabakunaan nga adda ur-urayenda nga aktibidad ken agbiahe iti uneg ti kurang a 24 oras iti ruar ti probinsia ket saanen a kasapulan nga mangipakita iti (Covid-19) test results,” kunana.
Ngem sakbay a rumruar iti probinsia, kinuna ni Talaga a nasken nga agsardengda iti border checkpoint ken mangala iti maysa a border pass, tapno masigurado nga agsublida iti uneg ti nakurang pay a 24 oras tapno maliklikan iti di nasken a pannakataktak.
Para kadagiti saan a nabakunaan wenno saan pay a naan-anay a nabakunaan nga agbiahe para iti napateg a panggep, kinuna ni Talaga a maysa a border pass, identification card, ken maysa nga endorsement para quarantine iti kasapulan a maala iti border checkpoint.
Maibatay iti kabaruan nga rukod ti alerto nga imparuar iti Inter-Agency Task Force for the Management of Emerging Infectious Diseases (IATF-EID), ti probinsia iti Ilocos Sur ket naipasidong iti Alert Level 2 manipud Nobyembre 13 agingga 30.
Iti baro nga alert level system ket naluklukay iti age mobility restrictions ken mangited iti sumagmamano a pangay-ayo para kadagiti nabakunaan a tattao.
Malaksid iti luglugar a naipasidong iti granular lockdown, iti panaggaraw iti uneg ken ballasiw dagiti siudad wenno munisipalidad ket maipalubos.
Kasta met, bayat a rinugian iti probinsia ti Ilocos Norte a lukayan iti travel protocols daytoy para kadagiti agsub-subli a residente, imparagawag iti Ilocos Norte Tourism Office idi Huebes (Nobyembre 18) nga dagiti naan-anayen a bakunado a turista nga bumisita iti probinsia ket saanen a kasapulan nga mangiprisintar iti maysa a negative coronavirus disease 2019 (Covid-19) test result apaman a sumangpetda iti pagbeddengan ti probinsia.
“Starting December 1, there will be no testing for fully vaccinated tourists who are coming from Alerts levels 1, 2, and 3 areas,” kuna iti Ilocos Norte Tourism office iti maysa a public advisory nga naipost ti official Facebook page daytoy.
Nupay kasta, dagiti turista a saan a bakunado ken saan pay a naan-anay a nabakunaan nga aggapo manipud Alert Level 4 ket nasken a kasapulan a mangipakita iti negative RT-PCR (Reverse transcription-polymerase chain reaction) test result a naala iti uneg ti 72 oras wenno antigen test a naala iti uneg ti 24 oras apaman iti isasangpetda, nainayon pay iti pakdaar.
Para iti naannayas a panagbiahe, mabalakadan dagiti turista nga agparehsitro iti online sadiay https://ilocosnorte.ph, mangitugot iti valid identification card, mangala iti maysa nga individual Quick Response (QR) code ken confirmed booking manipud accredited accommodation wenno local travel agency.
Iti maysa nga immun-una a sasao, kinuna ni Governor Matthew Joseph Manotoc nga iti pananglukay iti travel protocols ket in-inut gapu ta iti vaccination rate ti probinsia ket dandani kagudua iti puntirya a 70-porsiento ti populasion.
(LA-PNA Ilocos/PMCJr.-ABN)