Panangpalawa ti STL, pinalubosan ti Ilocos Norte

November 10, 2018 Headlines

SIUDAD TI LAOAG – Sinuportaran ti gobierno ti Ilocos Norte a mapalawa ti small-town lottery (STL) iti probinsia babaen ti panangbigbig kadagiti Authorized Agent Corporations (AACs) kas extension ti Philippine Charity Sweepstakes Office (PCSO).
Sangsangkamaysa nga inaprobaran ti Sangguniang Panlalawigan wenno Provincial Board idi Nobiembre 5 ti Draft Provincial Resolution No. 2018-10-281 a mangmangted ti bileg kenni Governor Ma. Imelda Josefa “Imee” Marcos a makitulag iti PCSO para iti operasion ti STL iti probinsia kas suporta iti mandato ti PCSO a mangpartuat iti ad-adu pay a mausar kas pundo kadagiti nagduduma a programa ken proyekto iti salun-at.
“There is a need to authorize the governor for this purpose, to increase its share from the PCSO charity fund,” kinuna ni Provincial Board Member Vicentito Lazo.
Kas nailanad iti singasing a memorandum of agreement (MOA), kasapulan a mangilatang ti PCSO ti gatad manipud iti charity fund para iti provincial government ti Ilocos Norte a pakailaklakuan dagiti tiket ti STL.
“It is understood that this share is over and above the other assistance that the provincial government may be entitled to receive, such as ambulance, medical and hospital equipment, and endowment funds to hospital and charitable institutions usually being given by PCSO nationwide, as well as assistance for its medical or health-related outreach programs,” segun iti tallo a panid a dokumento manipud iti Provincial Board.
Manamnama a pirmaan daytoy ti gobernador ken PCSO iti mabiit.
Nagrugi ti STL idi 2006 iti administrasion ni sigud a Presidente Gloria Macapagal Arroyo. Ngem iti administrasion laeng ni Presidente Rodrigo Duterte a ngimmato iti agarup P1bilion ti binulan a matagtagilakuan manipud STL.
Pinasingkedan ti PCSO a ti operasion ti STL ket mayannurot iti paglintegan, klaro ken silulukat iti publiko.
Ti panagpili kadagiti AAC ti STL ket babaen ti nainget a proseso kas nailanad iti 2016 revised STL Implementing Rules and Regulations a masarakan iti website ti PCSO (www.pcso.gov.ph).
Para iti panangpalawa ti STL operation, nabukel ti STL task force a pakairamanan ti Office of the Executive Secretary, Department of Justice, Department of Finance, Department of the Interior and Local Government, ken PCSO tapno masigurado a maragpat ti gagem daytoy aglalo ti nangatngato a panagkolekta ti buis ken pannakapartuat dagiti panggedan.
Kabayatanna, agtultuloy ti panangparmek ti Philippine National Police kadagiti illegal a sugal. Adda pakabuklan a 7,254 tattao ti naaresto ken nasurok P3 million ti nakumpiskar mainaig iti illegal a sugal idi 2017. L.ADRIANO, PNA / ABN