Rebate program indagadag ti OWWA para OFWs ti Ilocos

September 30, 2019 Headlines

SIUDAD TI SAN FERNANDO – Indagadag ti Overseas Workers Welfare Administration (OWWA) kadagiti amin a kualipikado nga Overseas Filipino Workers (OFWs) sadiay rehion ti Ilocos tapno gun-uddanda ti rebate program.
Kinuna ni Director Gerardo C. Rimorin, officer-in-charge ti OWWA Region 1 nga mabalinda nga maala iti PhP941.25 agingga PhP13,177.50 rebate maibatay iti bilang ti kontribusion nga nabayadanda.
“Dagiti kualipikado nga OFW para iti rebate program ket nasken a miembro ti OWWA iti uray 10 a tawen nga addaan uray lima wenno nasurok a kontribusion agingga Disiembre 31, 2017; ken iti OFW-member wenno iti pamiliana ket saan nga nakagun-od iti aniaman a programa wenno benepisio manipud iti ahensia,” kuna ni Rimorin.
Tapno mapalaka iti proseso ti OWWA Rebate Program (ORP), kinuna ni Rimorin nga maysa nga OWWA Rebate Portal iti pormal a nalukatan idi Setiembre 1.
“Tumulong iti OWWA Rebate Portal iti pannakaibunong iti rebate ken agsirbi a kas maysa nga database para kadagiti kualipikado nga OFWmembers. Baeten iti daytoy nga online system, nalaka nga mapasingkedan no kualipikadoda para iti rebate program. Agsirbi met daytoy a kas appointment system nga iti kualipikado a benepisario ket mangikeddeng ti maysa nga appointment iti regional officemi,” palawag ni Rimorin.
Tapno masukimat nu kualipikado para iti rebate, kuna na nga mabalin nga ag-log iti OFW iti www.owwa.gov.ph, sungbatan iti online verification form.
“Nu kualipikado, mabalinda nga mangikeddeng iti maysa nga appointment iti regional office tapno magun-odda iyi rebates. Para iti kanayonan nga impormasion, umawag iti OWWA hotline 1348 wenno mangted mensahe sadiay OWWA Rebate Program Facebook page,” kuna na.
Para iti bukod Rehion 1, addaan 40,000 OFW ti mapatta-patta nga kualipikado nga makagun-od ti ORP.
“Kaaduan kadagiti kualipikado iti ORP sadiay rehion ti Ilocos ket marino (seafarers) gapu ta mamindua angingga mamitloda nga agbayad iti OWWA premiums kada tawen, saan a kas kadagiti domestic helpers nga makabayadda laeng las-ud iti dua a tawen wenno kalpasan iti kontratada sadiay ballasiw-taaw,” kuna na.
Kinuna na nga iti ORP ket panagtulnog iti Section 67, Rule IV ti Implementing Rules and Regulations (IRR) ti Republic Act No. 10801, nga panggep daytoy nga bigbigen dagiti nabayagen a miembro ket mapaayanda iti rebates ken pinansial a tulong.
“Mairuar iti rebate kada tallo a tawen. Iti sumaruno nga eskediul ti panangbayad ti rebate iti OWWA ket inton 2022,” kuna ni Rimorin.
 
JCR/FGL, PIA1/PMCJr.-ABN