Strawberry Festival, tuloy kahit kulang sa budget

February 4, 2017 Headlines

LA TRINIDAD, BENGUET – Bagaman kalahating milyon lamang mula sa target na P2.9 milyon ang hawak na budget ay nakahanda na ang bayan ng La Trinidad para sa taunang selebrasyon ng Strawberry Festival.
Sa isang panayam kay Municipal Tourism Officer Valdred Olsim ay inamin nito na P0.5 milyon pa lamang ang hawak nilang budget na tinatayang 17 porsyento lamang ng target budget.
Aniya, P250,000 ay gagamitin para sa pagpapakain sa komunidad bilang bahagi ng pagdiriwang at ang natitirang kalahati ay inilaan para sa iba pang aktibidad.
Sa kabila nito ay sinigurado ni Olsim na ang kakulangan sa budget ay hindi makakaapekto sa taunang selebrasyon dahil patuloy pa rin silang umaapela sa mga konsehal ng bayan na aprubahan ang hinihiling nilang budget.
Inaasahang makakatulong din ang pagbubukas ng trade fair upang malikom ang ninanais na budget na P2.9milyon para maisakatuparan ang lahat ng aktibidad at maiwasang magkaroon ng shortage sa pondo.
Samantala, tatalakayin sa isang kapihan sa ika-8 ng Pebrero sa BSU Strawberry Farms ang iba’t-ibang aktibidad at mga isyu kaugnay sa pagdiriwang ng Strawberry Festival.
Ilan sa mga nakatakdang aktibidad ay ang Owik tan Tayao, Drum and Lyre Parade, Mass Wedding, Mr. and Ms. La Trinidad na gaganapin BSU Gymnasium at isang pang pinaghahandaan ng munisipalidad ay ang pagbabalik ng Giant Strawberry Cake.
Ani Olsim, hinihintay pa ang kompirmasyon ng Valley Bread na posibleng gumawa ng higanteng cake na ito. Ngunit bilang alternatibo ay maaring isang local bakeshop sa La Trinidad ang magsakatuparan nito.
Sa kabila nito ay positibo pa rin si Olsim na magiging matagumpay ang selebrasyon ngayong taon.
Sa isang niyang post sa social media noong Pebrero 2 ay inihayag ng tourism officer na ipinagmamalaki nito ang partisipasyon ng mga barangay, paraalan at pribadong partners ng La Trinidad. “We are proud that despite our limited funding, we are ambitious in having as many activities that we can so that our folks and visitors alike can enjoy our country’s only Strawberry Festival,” aniya.
Inimbita ni Olsim ang mga turista at bisita na bukod sa Panagbenga ng Baguio ay tunghayan din ang selebrasyon ng ika-36 Strawberry Festival na ang tema ngayong taon ay “Sustaining the fruits of La Trinidad’s agro-eco tourism”. Aubrey Morales, UC Intern / ABN