Suspek iti pannakapapatay ni ex-kongresman Eriguel, nakemmeg

May 19, 2018 Headlines

AGOO, LA UNION – Inbunannag ti Philippine National Police idi Mayo 15 ti panangkemmegda iti maysa a suspek iti pannakapapatay ni dati a La Union 2nd District Rep. Eufranio Eriguel.
Segun kenni Police Supt. Marlon Paiste, information officer ti Police Regional Office iti Ilocos (PRO-1), naidarum iti three counts of murder ti suspek a ni Felizardo Villanueva, timmaray kas barangay chairman iti Barangay Capas ngem naabak.
“Villanueva was arrested based on a recovered cellphone and the statement of witnesses,” kinuna ni Paiste. Naarestar ti suspek kalpasan ti napasamak a pammaltog idi rabii ti Mayo 12.
Ni Eriguel, a mapapati a suporter ti karibal ni Villanueva a kandidato, ket napalpaltugan bayat nga agsasao daytoy iti sango ti kagimungan iti Barangay Capas. Dua kadagiti bodyguard ni Eriguel, Bobby Ordinario ken Mac Roel Tuvera, ti nairaman a natay.
Kabayatanna, pimmusayen ti maysa a suporter ni Eriguel a ni Santiago Ricardo nga immuna a nabigbig kas Patric Manabat, maysa kadagiti walo a naireport a nadangran iti pammaltog, gapu kadagiti dunor a sinagrap na.
Malaksid kenni Ricardo, adda maysa pay a kritikal ti kasasaadna bayat nga innem kadagiti nadangran iti pammaltog ket nasayaaten ti kasasaadda.
Kinondenar met ni Presidential Spokesperson Harry Roque ti nasao nga insidente.
“We strongly denounce the killing of ex-La Union Rep. Eufranio Eriguel.
“Investigators are now gathering evidence as we vow to bring justice to the slain congressman and his bereaved family,” segun iti statement nga inruar ti Presidential Communications Operations Office idi Mayo 13. H.AUSTRIA, E.BELEO / ABN