Trabaho lang wen

May 26, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Nalpasen ti barangay election ket natural adda nangabak, adda naabak. Ngem adda latta dagiti saan a mangaklon a naabak ta kunada nga adda irregularities nangruna dagiti maysa laeng a puntos ti nakaatiwanda. Adda met dagiti agpada ti botosna nangruna kadagiti kagawad a number seven, ngem sakbay a maiproklamada, ma-break ti tie. Makaammo metten ti taga-Comelec iti dayta a gundaway, adda binnunotan wenno toast the coin kunadansa.

Ditoy batugmi a langit, Kayong Angkuan, maysa laeng ti lamang diay nangabak a kapitan. Ket tay nanglaban iti agdama a kapitan ti nangabak. Isu nga idi pay la idiay presinto addan napasamak a kasla recount iti final tally ket lamang latta. Sinolbardan dagiti ibagbagada nga irregularities ta adda botos ti kapitan a naikabil iti kagawad ngem narisot dayta. Agpadan a di naibilang dagidiay ibagbagada iti maysa a presinto ket—awan, lamang latta iti maysa diay nangabak. Naiproklama diay nangabak ngem napan nagipila iti protesta diay naabak nga agdama a kapitana. No anianto ti tungpalna no palubusan ti korte a ma-recount ti botos, isun ti urayen ngem kabayatanna, siempre agtugaw latta ti nangabak a kapitan inton Hulyo 1, 2018.

Kumusta metten dita luglugar wenno barangay yo, Kabarangayan, kakayong, kailian, awan met laeng ti nagbalin a parikut dita idi barangay election? Ditoy ayanmi, adu latta. Umuna, listaan dagiti botante, damagenmi laeng koma iti Comelec no ania ti napasamak? Saan da kadi nga aup-dated wenno dida kayat ti ag-update. Makasuron a makapaluksaw a panunoten kakayong mi ida, agasem ta diay nabayagen a nalpas a dimaga, adda pay la nagana. Idinto ta diay sibibiag ket awan naganna iti listaan? Sige man, ipalawag yo man Apo a mangiturturong, panagkunak ket saan laeng a ditoy batug mi a langit ti naaddaan ti kasta a parikut. Makaparurod a makapaluksaw saan kadi?

Gapu iti dayta a parikut, adu met ti saan a nakaanus a nagbiruk iti naganda isu nga adu dagiti saan a nakabotos ta kasanu, tay natay nagbiag ket diay sibibiag natay, ma-gets mo Kayong Angkuan? Wen a ta diay sibibiag awan naganna iti listaan dagiti botante idinto ta diay nabayagen a dimmaga a kas iti kunak, adda pay laeng. Kunada iti napalabas, no saanka a mapan ag-update ken agpa-biometric no saanka a nakabotos iti namindua, maikkaten iti listaan ti naganmo. Okey, kasta ti naaramid ngem, dagiti nakabotos iti napalabas a presidential election, awanen naganda ngem dagiti natayen iti manu a tawen ken saanen a nakabotos idi 2016, adda pay laeng met naganda? Ano ba yan, agdamag kami man laeng, Apo a mangiturturong, agtartrabaho kayo met laeng wenno saan? Ala dikay koma gumurgura ta agdamagdamag kami laeng ken segun iti naamuanmi iti napalabas a barangay election. Kunada ngarud, batu-bato sa langit, ang tamaan ay—siempre bukol, wahahaha, hay nakuuu!

Maudi a napaliiw mi, kakayong, ditoy batug mi a langit ania, kaaduanna a dagiti nangabak ket dagiti pinili ti maysa a sekta nga inyindorsoda. Nagdamdamag kami kadagiti am-ammomi a kameng daytoy ket kunada, adda kanu nag-survey ken nag-CI kadagitoy a nagited iti suratda iti kangatuan a mangidadaulo iti daytoy ta nadamagmi no ania ti criteria da piman ngem awan met maibagada adda kan dagiti nabaun nga agsaludsod iti kinatao dagitoy ngem saanko a patien ta dagiti napili da ket—sus maria kusina, ti ammomi ketdi — amm, bay-amon… paliiwentayo laeng no ania met ti maaramidan manen dagitoy a nangabak ta iti naglabas a lima atawen a panagtakem dagiti naisubli a nabotosan, waleeeyyyy a kunada ti naar-aramid da. Sorry, Apo, awan personalan a kunada, trabaho laeng daytoy.

Ala ngaruden, kasta pay kakayong ta ne, overtime tayo manen, babayoo, tsup tsup muahmuah.