12 arestado sa pagsalakay sa Dagupan cybersex den

September 19, 2018 Provincial

LUNGSOD NG DAGUPAN – Arestado ng National Bureau of Investigation Dagupan District Office (NBI-DADO) ang 12 katao nang salakayin ang hinihinalang cybersex den na nagkukunwaring call center sa Barangay Tapuac, dito noong Setyembre 14, 2018.
Ayon kay NBI-DADO head agent Rizaldy Jaymalin, ang operasyon ay isinagawa sa bisa ng search warrant na nilagdaan ni Presiding Judge Gonzalo P. Marata ng Regional Trial Court Branch 48 sa Urdaneta City, laban sa diumano’y call center na may kahina-hinalang gawain dito, na pag-aari ni George Adam Tan.
“Two months ago, we received intelligence information regarding that establishment, and validated it. Once its accuracy was verified, we immediately applied for a search warrant, and it was granted,” ani Jaymalin.
Aniya, 11 katao na binubuo ng siyam na lalaki at dalawang babaeng empleyado ng establisimyento ang nakitang nakikipag-chat sa mga dayuhan nang isagawa ng mga agents ang search operation.
Ang mga lalaking empleyado, ani Jaymalin, ay nagkukunwaring mga babae na nakikipag-usap ng live sa kanilang mga kliyente.
“For as low as USD50 on signing up, these foreigners will be able to chat with them and see the woman behind the camera, not knowing that they were being scammed into viewing already pre-recorded video clips of (other) women,” aniya.
Wala sa nasabing lugar si Tan, ani Jaymalin, nang isagawa ang search warrant, subalit dumating ito kalaunan kasama ang kaniyang abogado.
Dagdag niya, ang mga paglabag sa clearances ng establisimyento ay nadiskubre nang magsagawa ng malalimang imbestigasyon ang mga otoridad.
“They applied for a barangay clearance, with a business inclined for ‘encoding’, and a business permit intended for ‘general services’,” ani Jaymalin.
Ilang mga computers, storage devices at iba pang paraphernalia, na sasailalim sa mas malalim na pagsusuri mula sa technical experts, ang kinumpiska ng mga otoridad sa nasabing pagsalakay.
Sa pagsisiyasat, paglabag sa Article 201, na may kaugnayan sa Republic Act No. 10175 o ang Cybercrime Prevention Act, ang haharapin ni Tan at ng mga empleyado sa harap ng Provincial Prosecutor, ani Jaymalin.
“We are still conducting profiling and background checking of the arrested employees, also to identify whether there are minors among them,” diin niya. A.PASION, PNA / ABN