97% TI BAGUIO-BENGUET JEEP OPERATORS NACONSOLIDATE PARA MODERNIZATION

April 12, 2024 Metro BLISTT

SUIDAD TI BAGUIO

Dumanonen iti 96% agingga 97% dagiti jeepney drivers ken operator’s iti Baguio-Benguet ti nakapagpaconsolidate para iti programa ti gobyerno a Public Utility Vehicle (PUV) Modernization. Iti panakiuman ti Bombo Radyo kenni Rogel Canao, dadaulo ti MANIBELA Transport Group ti BaguioBenguet, dagiti nabatbati a porciento iti saan pay a
nakapagpaconsolidate ket dagiti saanen nga inakseptar ti Land Transportation Franchising and Regulatory Board(LTFRB) nga aplikasyon gapu iti saan pay nadakamat a rason.

Sigun kenni Canao, mabalin a mangitunda ti suppiat iti baet dagiti operators nu agtipon dagitoy iti maymaysa a
korporasyon rason a kidkiddawenda ti panagtalinaed ti indibidwal a prangkisa. Malaksid iti dayta, inlawlawag ti nasao nga opisyal a saanda a kontra iti Public Utility Vehicle (PUV) Modernization program, nu di ket iti consolidation wenno panakaipasidong dagitoy iti kooperatiba nu sadino awanen ti kontrolda iti prangkisa, ken
posible a mapasamak ti saan a pagkikinnaawatan.

Innayon ni Canao a mabalin a matungpal ti nasao a modernisasyon uray awan ti consolidation gapu ta silulukat met dagitoy iti ideya nga iupgrade dagiti tradisyunal a luganda. Kabayatanna, umapapela dagitoy iti gobyerno a dagiti produkto ti local manufacturers ti gatangenda a yunit saan a dagiti nagtaud iti sabali a pagilian tapno malakaanda iti presyo ken naparpartak a matarimaan ken maibirukan ti piesa apaman nga agpalya daytoy. Kasta met a makidkiddaw ti panakapalaka dagiti requirements para kadagiti manufacturers tapno saan dagitoy a marigatan.

Bombo Radyo-Baguio/Bombo Rob Dominguez