OWWA eskolars iti Ilocos Norte, napadayawan

June 25, 2019 Provincial

SIUDAD TI LAOAG – Agdagup ti 20 nga eskolars ti Overseas Workers Welfare Administration (OWWA) ti napadayawan idi Biernes ditoy babaen ti panagkinnamayet ti ahensia ken ti lokal a gobierno iti Ilocos Norte.
Naisayangkat ti simple a “Parangal sa mga OWWA scholars” iti auditorium ti kapitolio nga inatendaran dagiti kakabagian dagiti eskolars a nagturpos iti kolehio, haiskul ken elementaria; dagiti opisiales iti Ilocos Norte; ken dagiti empleado ti OWWA iti Rehion 1.
Kinuna ni Gerardo Rimorin, agdama a direktor ti OWWA Rehion 1, nga anak dagiti overseas Filipino workers (OFWs) iti Ilocos Norte dagitoy napadayawan nga eskolars.
Maysa kadakuada ti nagturpos iti kolehio a kas “summa cum laude.” Inwaragawag ni Rimorin nga adu nga eskolarship slots ti ipapaay ti OWWA kadagiti kualipikado nga annak ti OFWs.
Iti agdama, saanen a limitado ti eskolarship slats para kadagiti annak ti OFWs.
Ibilangna a nagasat dagitoy nga eskolars gapu ta libre ti panagbasada iti elementaria, haiskul wenno kolehio iti laksid nga agub-obra iti ballasiw taaw dagiti nagannak kadakuada.
Kinunana nga agdagup ti P5,000 ti stipend nga awaten ti maysa nga OWWA eskolar iti elementaria iti kada tawen; P8,000 para ti tunggal eskolar iti haiskul; ken P10,000.00 met para ti eskolar iti kolehio.
Masapul a kameng ti OWWA ti maysa nga OFW tapno kualipikado nga agbalin nga eskolars dagiti annak da wenno dependents da.
Kabayatanna, kinuna na pay a ti napasapamak a “Parangal sa mga OWWA scholars” ti umuna a naisayangkat iti Rehion 1 babaen iti tulong ken suporta ni Gobernador Imee Marcos, a nabotosan a senador itay napalabas nga eleksion.

AMB/FGL, PIA 1/PMCJr/ABN