Panukalang anti-tsismis ng isang barangay, usap-usapan sa Baguio

February 9, 2019 Metro BLISTT

Naging maugong at usap-usapan sa lungsod ang panukala ng Barangay Upper Rock Quar ry na Anti-Tsismis Ordinance noong ika-4 ng Pebrero 2019. Layunin ng naturang panukala na pigilan ang mga residente na magkalat ng maling impormasyon at ituon na
lamang ang atensyon sa mas mahahalagang bagay kaysa magtsismisan.

Napagdesisyunan ng mga opisyal ng baragay na magmungkahi ng ganitong ordinansa dahil sa madalas na reklamo sa kanilang barangay tungkol sa tsismis na nagiging sanhi ng away. Nais din ng mga opisyal na makilala sila dahil sila ang nakaisip sa ordinansang ito na dapat gayahin din ng iba pang barangay sa Baguio City sapagkat naniniwala silang makakatulong ito sa mga residente ng lungsod.
Nagkaroon ng pangkalahatang pagtitipon sa naturang barangay at
ipinaliwanag ng mga opisyal ang ilan sa nilalaman ng naturang ordinansa at maging ang parusa kapag lumabag ang mga residente.
Ayon sa ilang residente ng barangay, pabor sila sa nasabing ordinansa dahil makakatulong ito sa ikakatahimik ng kanilang
barangay laban sa mga taong “mimi” o “mimosa” na ang ibig
sabihin ay tsismosa. Nagpahayag naman ng pangamba ang ilan dahil maaring maapektuhan ang kanilang negosyo tulad ng
transients at apartments sapagkat ang ordinansa ay maaaring maging dahilan upang ang mga naghahanap ng mauupahan ay hindi maghanap ng tutuluyan sa kanilang barangay. Nais din nilang malaman ang kabuuang nilalaman ng ordinansa dahil hindi pa malinaw sa kanila ang implementasyon nito.
Ayon kina Kagawad Joel Kidpan, Arci Tudlong, Dennis Pacalso at Loida Dumagas, ang ordinansa ay makakatulong sa kanilang barangay para maiwasan ang mga nagrereklamo tungkol sa mga tsismis na dahilan ng hindi pagkakaunawaan ng ilan sa mga residente. Umaasa silang maaprubahan ang kanilang iminungkahing ordinansa sa susunod na pagpupulong nila sa ika-15 ng Pebrero.
Nilinaw din ni Kidpan na ang implementasyon ng ordinansa ay hindi agresibo, hindi sila maguutos ng tao upang magmasid sa paligid para magmanman ng mga tsismosa at tsismoso. Bagkus,
aniya, sila ay maghihintay lamang ng reklamo sa kanilang tanggapan bago sila umaksyon at magpataw ng karampatang parusa sa sinumang mapapatunayang nagkasala.
Ang parusa sa unang pagkakasala ay multang P300 at isang araw na serbisyo sa komunidad; sa ikalawa ay P500 at isang araw na serbisyo sa komunidad; at sa ikatlong pagkakasala naman ay P1,000
at isang araw na serbisyo sa komunidad.