Plastic ban, mahigpit na ipatutupad ng LT

March 10, 2018 Provincial

LA TRINIDAD, BENGUET – Simula Mayo 1 ay mahigpit nang ipatutupad ang plastic ban sa bayang ito.
Sa ilalim ng Municipal Ordinance 11-2015 ay ipinagbabawal ang paggamit ng “plastic, styrofoam, and other synthetic materials” na nakakasama sa kalikasan at itinuturing na pangunahing sanhi ng lumalalang problema sa basura ng munisipalidad.
Sa isang abiso na pinirmahan ni Mayor Romeo Salda at ipinakalat sa iba’t ibang establisimyento, “You are enjoined to properly dispose of these materials before May 1, We further require all business establishment to use eco bags and other reusable bags as carry out bags.”
Ang pagpapatupad ng nasabing ban ay makakatutulong upang maiwasan ang paggamit ng mga plastic at maisulong ang paggamit ng mga reusable bags tulad ng mga cloth bags at bayong.
Ipinagbabawal din sa mga business establishments ang pag-pack gamit ang plastic bag lalo na sa mga dry goods ngunit pinahintulutan ang paggamit ng plastic na walang hawakan o cellophane sa mga nagbebenta ng wet goods bilang secondary packaging material para mapanatiling malinis ang mga ito.
Ayon kay Municipal Environment and Natural Resources Officer Arthur Pedro, naipakalat na ang mga notice sa munisipalidad para maipaalam sa mga residente ang nasabing plastic ban.
“Naglagay na kami ng mga notices around para ma-inform na natin yung public para nga dito sa full implementation ng plastic ban dito sa La Trinidad and these succeeding months before nung plastic ban natin eh mag-disseminate pa kami ng notice para mapaghandaan talaga yung ating plastic ban.” Dagdag pa niya na suportado ng mga malalaking establisimyento sa La Trinidad ang plastic ban, kasama na dito ang SM Supermarket, Puregold at Tiong San.
Ang mga lalabag sa nasabing ban ay magmumulta ng P1,000 sa first offense; P2,000 sa second offense; at P2,500 sa third offense at maaring makansela ang permit.
Hinihikayat naman ng pamahalaang lokal ang mga residente na makiisa at tangkilin ang paggamit ng mga eco bag, bayong at mga katulad na lalagyan upang mapanatili ang kalinisan at kaayusan sa buong munisipalidad. ALLAN LEMUEL C. SUNGA, UB Intern / ABN