Tourism partnership, potensiyal para sa Ilocos Norte at La Union

March 10, 2018 Provincial

SAN FERNANDO CITY, LA UNION – Hindi magtatagal ay maaaring buksan ang potensiyal ng tourism partnership sa pagitan ng Ilocos Norte at La Union.
Sa pagdalo ni Ilocos Norte Governor Imee Marcos sa 168th Foundation Anniversary Celebration ng La Union noong nakaraang linggo ay sinelyuhan niya ang kooperasyon sa pagitan ng dalawang probinsiya bilang ‘the perfect partnership’, na itinampok ang surfing areas sa mga bayan ng San Juan, La Union; Pagudpud at Badoc na kapuwa nasa Ilocos Norte bilang perpektong ‘back to back’ na lugar.
“Ngayon kasi, mayroon na kaming 1.8 million na turistang dumadaong, tapos dumadating din yung Star Cruises from December to May, so there are about 2,600 coming off the boat [every week], and honestly we don’t have the hotels nor restaurants to accommodate all of these people,” pahayag ni Governor Marcos.
“I need to share it to everyone, at sino pa kundi ang ating mga ‘kaarruba’ (neighbors) dito sa Region One.”
Sa makahulugang ngiti ay sinabi ni Marcos na higit sa kompetisyon sa industriya ng turismo sa Ilokandiya ay ang pagkakaisa at kooperasyon.
Pinuri ni Marcos ang kuwalidad ng mga piyesta ng La Union at sinabing, “the quality and the standard of the fiestas in La Union are nationally recognized. Alam na alam namin na napakagaling ninyo, so siyempre, gagayahin namin ang ginagawa ni Apo Pacoy Ortega [La Union Governor Emmanuel R. Ortega] at lahat ng mga tropa rito.”
Suhestiyon pa niya, “sana magkaroon tayo ng mga joint of all Ilocano festivals, para much more fun, with all the things we have in common.”
Nauna rito ay hinikayat ni Marcos ang Cordilleras at Baguio City sa idinaos na Grand Street Dancing Parade ng Baguio Flower Festival na magtulungan sa pagpapa-unlad ng turismo na pinapahalagahan ang pagbibigay kaysa kompetisyon. “We will see to it that there will be a deeper connection between Baguio City, the Cordillera and the whole of Ilocandia in terms of tourism and development sharing,” aniya.
Noon lang Pebrero 2 ay inilunsad ng Ilocos Norte ang Bicentennial Year na may espesyal na edisyon ng Tan-ok ni Ilocano Festival of Festivals na tinipon ang iba’t ibang bayan at lungsod ng probinsiya sa isang ‘grand spectacle of festival dances and performances’. ABN