“Tourism ambassadors” makatulong iti Ilocos Norte

June 10, 2019 Provincial

SIUDAD TI LAOAG – Dakkel a tulong ti kaadda dagiti “tourism ambassadors” iti agtultuloy a panagdur-as ti programa iti turismo iti Ilocos Norte, segun kenni Provincial Tourism Officer Ianree Raquel.
Kinuna ni Raquel a maikawalon a tawen ti kaadda ti programa a “tourism ambassador” iti probinsia babaen iti panangilunsad ni Gobernador Imee Marcos.
Umaboten ti 12 a grupo dagiti agtutubo ken propesional a nagserbi a kas tourism ambassador iti probinsia a mangrugi iti Semana Santa agingga ti malpas ti bakasion iti summer.
“Maideploy dagitoy a tourism ambassadors kadagiti nadumaduma a pagpasiaran iti Ilocos Norte, estasion ti bus ken dadduma pay a lugar a pagur-urnongan ti tao iti probinsia,” kinuna ni Raquel.
“Dagitoy a tourism ambassadors ti mangkuyog kadagiti amin a turista nga agpasiar kadagiti naduma-duma a lugar iti probinsia,” innayunna.
Kabayatanna, napagtalinaed ti Ilocos Norte ti kinaadu ti bilang dagiti turista nga immay nagpasiar kadagiti naduma-duma a nangayed a lugar iti probinsia itay napalabas a Semana Santa.
Iti pakauna a report ti Provincial Tourism Office, kinuna ni Raquel nga umabot ti 500,000 a turista ti bimmisita iti probinsia idi selebrasion ti Semana Santa ita tawen.
“No maidasig itay napalabas a tawen, ngimmato ti 6 a porsiento ti bilang dagiti immay a turista ita a tawen kabayatan ti Semana Santa,” kinuna ni Raquel.
Kinunana a ti maysa a rason a ngimmatuan ti bilang dagiti turista itay napalabas a semana gapu iti kinapintas ti negosio iti benneg ti turismo.
“Nagdudupudop dagiti turista a napan nagpasiar kadagiti naduma-duma a lugar ti probinsia manipud iti ili ti Badoc agingga iti Pagudpud, kinunana.
Inpalgak ni Raquel nga adda pay dagiti kabaroanan a lugar a pagpasiaran dagiti turista iti probinsia a pakaibilangan ti Sunflower Farm iti ili a Piddig, Madongan Dam, Solsona-Apayao Road ken ti Vintar bike line ken zipline.
Impadamag pay ni Raquel a “zero casualty” ti nairekord ti kapulisan kabayatan ti selebrasion ti Semana Santa ti Ilocos Norte ita a tawen malaksid laeng kadagiti sumagmamano a napasamak a desgrasia iti kalsada.
 
FGLPIA1/PMCJr/ABN