24-ANYOS A CALL CENTER AGENT PIMMUSAY ITI MOTORCYCLE ACCIDENT

December 30, 2023 Provincial

LA TRINIDAD, BENGUET

Pimmusay ti maysa a babai iti napasamak a motorcycle accident idiay Shilan, La Trinidad, Benguet itay nabiit. Nabigbig ti pimmusay a biktima a ni Divina Ugalde Vidal, 24-anyos, call center agent, tubo ti Mankayan, Benguet bayat a ti driver ti motorsiklo ket ni Marc Christian Bayas, 23-anyos, estudyante, tubo ti Buguias, Benguet ken adda iti natalged a kasasaad. Maibasar iti interview ti Bombo Radyo kenni Police Lieutenant Anthony Cong-o, La Trinidad Municipal Police Station Traffic Management Section Office, nakamotorsiklo ti biktima ken ti nobyo daytoy.

Nagtaud dagitoy manipud Tublay, Benguet ken paturong koma dagitoy idiay La Trinidad, Benguet idi napasamak ti aksidente. Maibasar iti imbestigasyon dagiti otoridad, ag-overtake koma ti motorsiklo iti sarsarunoenna nga elf. Nupay kasta, naklaat ti driver ti motorsiklo ta adda gayam ti kanal rason a nagemergency brake daytoy a nangitunda met iti aksidente. Naitaray ti biktima iti Benguet General Hospital ngem naideklara a dead-on-arrival gapu iti nakaro a nasagrapna a dunor iti ulona. Naiyawid metten ti bangkay ti biktima iti pagtaenganda idiay Mankayan, Benguet.

Bombo Radyo-Baguio