First Private Schools Basic Education Congress, napapanahon

February 24, 2018 Editorial

Sinuspinde ang mga klase sa pribadong elementarya at sekondaryang paaralan sa lungsod ng Baguio noong Pebrero 22 at 23 ng Department of Education (DepEd)-Baguio sa bisa ng Division Memorandum 29, S. 2018 upang bigyan daan at oras ang mga guro at administrador ng mga pribadong paaralan na dumalo sa First Private Schools Basic Education Congress.
Ang nasabing aktibidad ay may temang: Meeting the Challenges of the 21st Century Education na isinagawa ng Association of Private School Administrators-Baguio City (APSA-BC) kasama ang DepEd-Baguio at may layuning gisingin ang kamalayan ng mga private school na ang pagsasama-sama para sa iisang layunin ay ang unang hakbang sa isang pagtutulungan para sa pagbabago.
Ilan sa mga topikong tinalakay sa kongreso ay ang Philippine quality framework on DepEd strategic directions until 2030, Applying positive discipline in response to the proper implementation of Child  Protection Policy and Anti-Bullying Act  of 2013, Grievance and administrative cases in private schools, Research-based practices on curriculum and administrative matters, Data Privacy Act 2012, at Updates on data management system.
Sa kasalukuyan ay may 101 elementary private schools at 56 secondary private schools sa Baguio, samantala sa Benguet ay may 51 private elementary school at 25 secondary schools.
Sa makabagong panahon ngayon ay totoong marami na ang nagbago sa mga kabataan, ito ay dahil sa paglaganap ng makabagong kaalaman sa siyensiya at teknolohiya na napakalaking epekto sa buhay ng tao lalo na sa mga mga-aaral.
Naapektuhan nito ang asal at pag-uugali ng mga bata sa paaralan man o sa kani-kanilang tirahan. Tunay na malaking hamon ngayon para sa mga guro at magulang ang mabuti at mahusay na paghubog ng mga kabataan para sa kanilang kinabukasan kaya ang mga aktibidad gaya ng kauna-unahang kongreso ng mga pribadong paaralan ay napapanahon upang mabigyan pansin at tugon ang mga problema na pumapalibot sa mga kabataan sa gitna ng makabagong mundo.
Isinama na rin sana sa mga tinalakay ang paksa ukol sa hindi paglimot ng mga mag-aaral sa mga basikong uri at gawi sa pag-aaral – gaya ng hindi paglimot sa pagbabasa at malinang ang angking talino sa pamamagitan ng mga basikong pamamaraan at hindi umaasa at dumedepende na lamang sa makabagong teknolohiya gaya ng mga computer at iba pang gadgets. Hindi masama ang mga makabagong teknolohiya, subalit kung ito ang magiging sanhi ng lalong ikaka-bobo ng isang bata ay kailangang supilin na ito.
Patunay ang mga pag-aaral medikal na ang mga makabagong gadgets ay nakaka-adik at marami ng kabataan maging may edad ang nahuhumaling na dito – minsan nagiging problema na sila ng pamilya at komunidad.
Sa ganitong kongreso ay isama na rin sana o kaya’y magkaroon din ng kagayang aktibidad ang mga nasa pampublikong mga paaralan dahil mas marami ang mga mag-aaral dito.
Muli, sana ay maging matagumpay ang kongresong ito para sa kapakinabangan ng mga mag-aaral, mga guro at magulang at ng bansa.                                                                                                                                     PMCJr.