Giyera sa Marawi, magtatagal pa kaya?

July 16, 2017 Daplis Walang Mintis Opinion

Malapit na ang pagtatapos ng 60-days simula nang ideklara ni Pres. Duterte ang Martial Law sa Mindanao. Ang pagkatig dito ng Korte Suprema kamakailan ay hindi maaaring sandalan upang dagdagan pa ang araw ng batas-militar. Dapat dumaan muli sa legal na proseso. Yan ang tapik ng mga legal na luminario lalo na ang kongreso. Kaya’t bago sumapit ang Hulyo 23, dapat may basbas na ang mga mambabatas (kung may hiling) sa maaaring pagpapatuloy pa nito sa buong Mindanao. Maraming pabor, marami ring kontra. May nagsabi ring sa Marawi na lang sana ang batas-militar. Meron ding nagsabing dapat ay limang taon na lamang. Pero ang konkretong dahilan kung bakit nakararami (as per survey) ang botong dapat i-extend pa ang Martial Law ay ang nagaganap pa ring giyera sa Marawi. Sa tingin nila, parang magtatagal pa ang giyera dahil may nagtatago pang mga terorista na may hawak na mga bihag na sibilyan. Hindi basta-basta bombahin na lamang agad ang kanilang kinalalagyan dahil tiyak madadawit ang mga pobreng bihag. Kaya ang tanong: kailan matatapos ang giyera?

******
Kamakailan sa isang okasyon, may daplis ang Pangulong Digong na matatapos na ang giyera sa Marawi sa loob ng labing-limang araw. Na ang ibig sabihin, itotodo na ng puwersa-militar (with PNP) ang pagpulbos sa mga terorista. Tiyak hindi na lang sniper vs. sniper ang labanan. Sasabay din ang air-strikes. Ang masakit ay ang nangyari kamakailan na resulta ng isang friendly fire kung saan dalawang sundalo ang namatay at labing-isa ang sugatan. Hindi sinasadyang nabagsakan ng bomba sa airstrikes ang isang lugar kung saan naroroon ang mga sundalo ng gobyerno. Kung sakaling todo-todo na ang upakan, may pangambang baka maulit ito. Ito na kasi ang pangalawang friendly fire dahil sa sumablay na pagbomba. Idagdag mo pa na may hawak pang mga bihag ang Maute-Isis group. Ang di lang natin alam, baka naman ang mga bihag ay pupuwersahing armasan at lumaban. Ang nakakatakot ay kung hindi sila susunod ay baka sila’y pupugutan. Laman kasi ng salaysay ng isang nahuling menor de edad na miyembro ng Maute na ang isang pagsubok sa kanila bago sila maging regular sa Maute, kinakailangang mamugot muna sila ng ulo. Sus maryusep!

******
Mahigit sa apat na raan na ang mga armas ng Maute ang narekober ng mga military sa mahigit sa apatnapung araw ng bakbakan. Marami sa mga armas na ito ay high powered. Saan galing ang mga armas na ito? Hindi raw basta-basta naipapasok sa Marawi ang daming armas na ito dahil masisita. Ibig sabihin, mahabang panahon nang naghanda itong Maute. Marami na silang imbak na armas at amyunisyon kaya di sila umaatras. Mahigit sa tatlong daang terorista na ang patay, mahigit sa otsenta naman sa government force at 39 sibilyan. May pangamba pang madaragdagan ang casualties sa mga susunod na araw. Halos durog na durog na ang mga kabahayan sa sentro na siyudad pero tuloy pa rin ang bakbakan araw at gabi, umulan man o umaraw. Kaya sa tingin ng marami, baka magtatagal pa ang labanan. Ang masakit, kung lilipat ang mga nakalusot na terorista sa ibang lugar at doon muli maghahasik ng kaguluhan. Marami pa ang magbubuwis ng buhay. Darami pa ang bilang ng mga mawawalan ng tirahan at ari-arian. Pag nagkataon, tatagal pa nga ang Martial Law sa Mindanao. Idalangin na lang natin na sana matapos na ang kaguluhan sa madaling panahon. Adios mi amor, ciao, mabalos!