Giyera sa Marawi, tapos na ba?

October 21, 2017 Daplis Walang Mintis Opinion

Kamakailan ideneklara ni Pangulong Duterte na “liberated” na ang Marawi City sa kuko ng sumakop na mga terorista. Ibig sabihin: liberasyon na! Walang pinag-iba sa mga lugar kung saan sinakop noon ng mga lumusob sa bansa noong panahon ng mga giyera. Kapag tapos na ang giyera, liberasyon na ang susunod. Yan ang maliwanag na katuturan ng liberasyon ng Marawi mula sa kamay ng lumusob na mga terorista – Maute-ISIS group. Pero may nagtanong: bakit liberasyon na eh, may lumalaban pang mga terorista sa nalalabing maliit (daw) na lugar na kanilang kinukubkob sa ngayon.  Ayon sa AFP: hindi na gaanong matatratong mapaminsala pa ang bilang ng mga teroristang nalalabi. Pero hindi ba’t puwede pa rin silang suportahan ng kanilang mga kasamahan mula sa labas ng Marawi? Ang sagot uli ng AFP: guwardiyado-sarado na raw nila ang kinaroroonan ng mga terorista at malabong may makakapasok pang ugmentasyon ng kanilang tropa.

******
Kamakailan lang, may 12-terorista ulit ang napatay ng tropa ng pamahalaan. Kung totoong mga 30 na lang ang kabuuan ng tropa nila, ibig sabihin ay mga 18 na lamang sila ngayon? Sagot ng AFP: mga ganun nga. Pero daplis ng iba:  napabalita kamakailan na pwersadong inaarmasan at pinapalaban ng mga terorista ang kanilang hostages na ayon sa tala, meron pang dalawampung hostages ang hawak ng mga terorista. Sa palagay natin, napanghinaan na sila (terorista) ng loob mula nang mapatay ng mga sundalo ang kanilang mga pinuno (Omar Maute at Esnilon Hapilon). Pero hirit naman ng iba: bakit wala na bang pumalit sa kanila? Sa hanay ni Hapilon, tiyak marami pa siyang mga kasunod  mula sa iba’t ibang grupo ng Abu Sayaf na nagkalat sa Mindanao. At kahit patay na ang apat na magkakapatid na Maute, gaano tayo makakatiyak na wala ng kaangkan ng Maute ang papalit at maghiganti?

******
Nakapitong ulit nang dinalaw ni Pangulong Digong ang Marawi. Mahalaga ito upang mabigyan ng moral boaster ang mga puwersa ng gobyerno kontra sa mga nalalabi pang terorista. Kasabay na rin ng dalaw niya ang alamin ang kalagayan ng mga Bakwit o mga residenteng nasa evacuation centers pa rin at upang sabihin sa mga ito ang plano ng pamahalaan para sa kanila ngayong patapos na ang giyera. May mahigit sa 78,000 Bakwit o evacuees ang pinangakuang makakabalik na sila sa kanilang mga bahay bago magpasko. Maryusep! Sir Digong, sabihin nating matatapos na ang giyera at malaya ng bumalik ang mga Bakwit, meron pa ba silang mga bahay na uuwian? Di ba’t durog na durog na ang mga ito? Di ba mas maganda kung bilisang tapusin na ang mga pansamantalang tirahan nila upang doon sila magpasko? Dalawa hanggang tatlong taon daw ang rehab ng Marawi war zones. So ibig sabihin, matagal pa sa temporaryong tirahan ang mga Bakwit? Sa palagay natin, magkahalong tuwa (dahil liberated na sila) at takot o pangamba ang naghahari ngayon sa buhay ng mga Bakwit dahil di nila alam kung kailan sila makakabalik sa kanilang mga nawasak na tahanan. Sila raw ba ang sasagot sa pagpapagawa sa luray-luray nilang bahay at negosyo o aalalay ang pamahalaan? Para sa kanila, may kalabuan pa ang kanilang katayuan. In short, patuloy pa rin silang makikipag-giyera sa pangamba at hirap sa mahabang panahon. Sa puntong ito (dahil may mga kalaban pa) tanggapin natin na hindi pa tapos ang giyera sa Marawi! Say ninyo?

******
Please share your experience with LOLO DORO “JIMMY LUZANO” AKA. MR. CARIñOSO  as we celebrate 50 years in the industry.  Send at 0928-506-5269.  Thank you,   Adios mi amor, ciao, mabalos!