Hauling ng basura pa rin ang mainam – Domogan

July 2, 2017 Metro BLISTT

Iginiit ni Mayor Mauricio G. Domogan na ang pansamantalang hauling ng residual waste ng lungsod papunta sa Capas sanitary landfill ang nananatiling pinakamainam na paraan para maiwasan ang posibleng krisis sa basura habang naghahanap ng pangmatagalang solusyon ang lokal na pamahalaan sa matagal nang problema sa basura.
Aniya, sa kanyang administrasyon ay napababa ang hauling cost mula sa P3,200 per ton sa mahigit P1,400 per ton na lamang.
“It will be far more expensive if it will be the local government that will do the hauling of garbage at source and then haul it to the Capas landfill. It is still best that we have qualified haulers who have waste transfer stations to haul the city’s residual waste to the accredited landfill,” saad ni Domogan.
Inamin ng mayor na kung ang pamahalaang lokal ang magsasagawa ng hauling ay hindi sasapat ang garbage trucks na magdadala ng basura papunta sa accredited landfill. Kaya kailangan ng lungsod na bumili pa ng 15 na garbage trucks na pandagdag sa kasalukuyang ginagamit ng lungsod upang may magamit na trucks na para lamang sa hauling ng basura paalis ng lungsod.
Aniya, kailangan din ng lokal na gobyerno na mag-invest sa pagdaragdag ng tauhan na magtatrabaho sa mga trucks na bibilhin. Ito ay maaaring magtagal pa dahil sa requirements ng pagkuha ng bagong empleyado na pinalala pa ng 45 percent prescribed limit para sa personal services na nakasaad sa probisyon ng Local Government Code of the Philippines.
Sa ngayon ay may 155 tons na residual waste ng lungsod ang dinadala mula sa waste transfer station ng hauler papunta sa Capas sanitary landfill.
Paliwanag ni Domogan na hindi makapag-relax ang gobyerno sa pagtugon sa lumalaking bulto ng basura na nalilikha ng mga residente ng lungsod at mga bisita. Kaya ginawa nitong requirement sa pagpili ng hauler ang pagkakaroon ng waste transfer station na akreditado ng environment and natural resources department.
Ani Domogan, ang kompetisyon sa pagitan ng haulers ay pinapasigla ng kung sino ang may kakayahan na magbigay ng pinakamainam na alok. Ang M.A. Camilo freight services ang laging nangingibabaw na qualified hauler dahil sa pagkakaroon nito ng registered at accredited waste transfer station, nakinukwestyon naman ng mga residente.
Binigyang-diin ng mayor na ang iba pang interesadong hauler na nais patalsikin ang kasalukuyang hauler ng lungsod ay maaaring makilahok sa bidding ng hauling services kung ang sole proprietor o ang kompanya ay may waste transfer station na akreditado ng environment department. Baguio PIO / ABN