P20M aid, inilaan sa 6,000 biktima ni Lawin

September 18, 2017 Provincial

LUNA, APAYAO – Nagbigay si Department of Labor and Employment (DOLE) Secretary Silvestre Bello ng P20 milyon para sa emergency livelihood assistance para sa mahigit 6,000 manggagawa sa probinsiya ng Kalinga at Apayao na biktima ng tropical depression “Lawin” noong Oktubre 2016.
Sa isang panayam kay DOLE Cordillera Regional Director Exequiel Guzman ay sinabi niyang ang halaga ay galing sa pondo ng Kalihim na ipinamahagi niya sa dalawang pinakamatinding tinamaan ng hagupit ni “Lawin”, ito ay ayuda bilang short term employment. Hindi regular na pondo ang pera ngunit nasa Kalihim na kung saang special programs niya gagastusin ito kaya minabuti niyang ibigay ito sa dalawang probinsiya ng Cordillera.
“Many of those poor families affected by Lawin hanggang ngayon wala silang natanggap na ayuda (they have not yet received an assistance). So we initiated the project proposal and submitted to Sec. Bello. It was done late last year. The fund was transferred this month and have started working, on going na ito,” pahayag ni Guzman.
Sinabi ni Guzman na mula sa P20 milyon ay tatanggap ang Tabuk City sa Kalinga ng P10 milyon na nasa 3,000 manggagawa ang mabebenipisyuhan sa emergency short term employment program. Nakakuha ang Pasil, Kalinga ng P6 milyon habang ang probinsiya ng Apayao ay P4 milyon na ipinamahagi sa iba’t ibang pinakagrabeng tinamaang LGUs.
“We submitted the proposal in October last year but it took time to profile the beneficiaries, who are the poorest of the poor parents with minor children who live below the poverty line.”
Ipinaliwanag ng director na ang mga local government units (LGU) ang pumili sa mga beneficiaries sa pagpunta sa malalayong lugar at sinigurong lahat ng apektado ay nakalista na bineripika ng DOLE na siya ring magdedetermina sa kuwalipikasyon. Inihanda rin ng mga LGU ang program of work.
Ang tulong ay para sa 30-day work performing work na may public value o nakagiya sa pagpapaunlad ng komunidad sa kabuuan gaya ng de-silting ng waterways, repair ng nasirang public buildings at mga daan kabilang na ang reforestration. Mababayaran ang mga beneficiaries sa kanilang daily wages at nabigyan din ng insurance para sa isang taon.
Binanggit din ni Guzman na maliban sa short term employment, ay mayroon ding long term livelihood assistance program ang departamento sa ilalim ng integrated livelihood program.
Ayon kay Guzman ay may isang assistance sa ilalim ng programa, ang cacao industry sa Kalinga kung saan may 100 miyembrong asosayon na may produktong cacao. Nagbigay ng equipment ang DOLE upang ma-convert ang cacao seeds sa tablea at ang Department of trade and Industry ay tumulong sa packaging at marketing.
Dahil sa tulong, mayroon nang mahigit 100 pormal na trabaho ang nalikha mula sa cacao industry. Ang parehong programa ay ginamit din sa coffee production industry ng rehiyon bilang tulong ng gobyerno sa small industries na nagbigay daan sa pagkakalikha ng ibang livelihood at employment opportunities. LIZA T. AGOOT / ABN