Pagbibigay ng clearance sa mga lote, hihigpitan

January 21, 2019 Metro BLISTT

Magiging mas mahigpit ang mga requirements para sa paglalabas ng mga clearance ng lote para sa registration applications upang maiwasan na malagyan ng titulo ng lupa ang mga bahaging road right-of-ways (RROWs).
Sinabi ni Mayor Mauricio Domogan na maliban sa requirement na certification na nagpapatunay na ang lupang nais palagyan ng titulo ay kabilang o nasa labas ng identified city o barangay needs na mula sa City Planning and Development Office, hihilingin din ng lungsod ang isa pang requirement, isang certification na nagpapakita na ang lote ay kabilang o nasa labas ng road right-of-way.
Ang RROW clearance ay magmumula sa City Engineering Office para sa city roads at sa Department of Public Works and Highways (DPWH) naman para sa national roads.
Sinabi ng mayor na ang naturang proseso ay makakatulong sa City Environment and Natural Resources Office (CENRO) na kilalanin ang mga lote na nasa RROWs at hindi kwalipikado na mabigyan ng titulo.
Ito ay resulta ng nakaraang pagpupulong ng City Lands Identification Committee na pinangungunahan ni Mayor Domogan at co-chaired ng council committee on lands chair Councilor Edgar Avila.
Sa naturang pulong, nagkasundo rin ang committee na ituloy ang survey sa lahat ng public lands na kinilalang nasa ilalim ng “city or barangay needs” upang makasiguro sa preserbasyon at proteksyon ng mga ito mula sa mga walang prinsipyo na sumasakop ng lupain.
Nauna nang bumuo ang mayor ng task force na magsasagawa ng final survey ng lahat ng identified lands habang P5milyong pondo naman ang inilaan para sa naturang survey.
“By all means we have to finish the final survey of these lands so we can save them from enterprising individuals and allot them for use of the public,” saad ng mayor.
Napagkasunduan din sa naturang pagpupulong na ang malilit na lupa sa pagitan ng mga tituladong pag-aari at kalsada ay awtomatikong magiging bahagi ng greenbelt area at ikokonsiderang “no-build zones”.
Sa mga lote naman na sakop ng 211 titles, sinabi ng mayor na nananatili ang paninindigan ng committee na hindi na kailangan pang buksan ang mga unvalidated lots para sa revalidation dahil magdudulot lamang ito ng mas maraming problema.
“As we all know, these unvalidated lots have long been made alienable and therefore are now occupied thus making them open for revalidation would pit old and new claimants against one another and would result to conflicts. We would not want that to happen,” sabi ng mayor.
A.P.REFUERZO/ABN