Panganib ng Bird Flu, huwag isantabi

August 27, 2017 Editorial

Kahit pa sinabi ng mga awtoridad na walang direktang malalang epekto sa kalusugan ng tao ang bird flu na una ng umatake sa mga poultry farm sa San Luis, Pampanga at sa Jaen at San Isidro, Nueva Ecija ay kailangan pa ring mag-ingat ang mamamayan. Subalit may mga ulat na may mga namatay na rin sa ibang bansa dahil sa bird flu kaya hindi rin dapat isaalang-alang ang dulot na pinsala nito sakali mang mahawa o makontamina ng nasabing virus.
Ang lungsod ng Baguio ay isang lugar na highly urbanized at maraming tao, bisita man o residente, gayundin ay marami ng mga negosyong manok ang pangunahing hain. Kilala rin ang lungsod at Cordillera na isa ang manok sa pangunahing gustong kainin kaya malaki ang demand dito.Ang probinsiya ng Benguet ay kilala ring taniman ng mga gulay na pinagkukunan ng buong bansa at marami pa ring magsasaka rito ang gumagamit ng ‘chicken dung’ bilang mga pataba, at ayon sa mga awtoridad ay maaaring makontamina ang mga dumi ng manok ng bird flu virus na maaari ding maikalat sa mga pananim at sa mga taong humahawak nito.
Bagama’t walang kaugnayan ay maaalalang lumalala na rin ang kaso ng ‘Japanese Encephalitis’ o ang pamamaga ng utak at dumarami na rin ang namamatay sa sakit na ito. Ang Japanese encephalitis ay nakukuha sa mga dumi ng kalapati.Lumabas ang ulat ng mga dalubhasa na may virus ng H5N6 na dulot ng Bird Flu. Noong una ay nagkaroon ng paglipana ng H1N1 virus na nagdukot ng pangamba at panganib sa kalusugan ng mga tao kaya dapat ibayong pag-iingat ang gawin ng tao upang maiwasan ang mga maaaring idulot na panganib sa kalusugan at buhay ng tao.
Kahit pa magtatag ng mga quarantine checkpoints ang mga awtoridad ay hindi malayong may makakalusot pa ring mga manok o kauri nito kaya sa simpleng pag-iingat ng tao sa pamimili at preparasyon ng mga kakaining manok gayundin ang pag-uulat sa mga awtoridad ng mga hinihinalang may sakit na mga manok at kauri nitong hayop.
Ang pagtugon sa problema sa Bird Flu at epekto nito hindi lamang sa kalusugan kundi maging sa hanap-buhay ng mga tao at ekonomiya ay hindi makakaya ng gobyerno lamang kundi kailangan din ng pakikipagtulungan ng mamamayan. At kahit sinabi ng mga opisyal ng lungsod at probinsiya ng Beneguet na wala pa ring kaso ng bird flu sa rehiyon ay hindi tayo dapat magwalang-bahala at dapat maging alerto. PMCJr.