470 magsasaka sa Pangasinan, binigyan ng land titles ng DAR

June 18, 2017 Provincial

URDANETA CITY – Namahagi ang Department of Agrarian Reform (DAR) ng mga titulo ng lupa sa 470 Pangasinenseng magsasaka sa pagdiriwang ng Farmers Festival na bahagi ng anibersaryo ng Comprehensive Agrarian Reform Program (CARP).
Personal na ibinigay ni Secretary Rafael Mariano sa mga benepisyaryong magsasaka ang kanilang Certificates of Land Ownership Awards (CLOA) na kaniyang inilarawan bilang isang “historical activity” para sa mga magsasaka noong June 8.
Ang mga land title ay sumakop sa mahigit 654 ektarya ng agricultural land at ang DAR ay magpapatuloy na tignan ang kailangan ng mga magsasaka, upang ang mga benepisyaryo ay maaaring masiyahan sa kanilang lupang sakahan, ani Mariano.
“Itong lupa ay ibinibigay sa inyo ayon sa batas… at lagi kong sinasabi, huwag kayong mang-aagaw ng pinagpawisan ng iba at ipapakain ninyo sa sarili ninyong pamilya,” saad ni Mariano sa ginanap na pagdiriwang.
Aniya, ang hamon ngayon sa DAR ay ang paglalagay sa mga hindi pa nailalagay na benepisyaryo na may hawak ng CLOA o patents.
“Mahalaga ang actual possession ng awarded land sa kanila. Hindi kumpleto ang kasiyahan pag hawak na ang CLOA pero malakas pa rin ang resistance ng land owner,” paliwanag ni Mariano.
Isinasaad sa Republic Act 6577 o CARP Law na ang karapatan at responsibilidad ng mga benipisyaryo ay magsisimula pagkatanggap nila ng emancipation patent o CLOA kasama na ang kanilang actual physical possession, aniya.
Sa pagdiriwang, namahagi ang Kalihim ng certificates of completion sa 71 nagtapos ng Farmers Business Schools at sa 144 nagtapos ng mandatory training na isinagawa ng Cooperative Development Authority (CDA). VHS/PIA-1, Pangasinan / ABN