Aplikasyon ti OWWA – 1 scholarship mangrugi inton Mayo 2

April 28, 2019 Provincial

SIUDAD TI SAN FERNANDO, La Union – Impakaammo ti Overseas Workers Welfare Administration (OWWA) iti Rehion ti Ilocos nga mangrugi iti panangipasa ti aplikasion da iti scholarship program inton Mayo 2, 2019.
Daytoy ket first come, first served basis gapu ta limitado laeng iti slots kada probinsia, gapuna nga binalakadan mi dagiti kualipikado ken interesado nga mangawit iti kasapulan nga dokumento kasla dagiti opisyal nga kopya ti grado da, mangrugi inton Mayo 2,” kuna ni Labor Communications Officer Geraldine Lucero.
Iti OFW Dependent Scholarship Program (OSDP) ket maysa nga pinansial a tulong nga addaan gatad na nga PhP20,000 kada tawen ti eskuela para kadagiti kualipikado nga dependent dagiti miembro ti OWWA.
“Ngem dagitoy miembro ti OWWA nga OFWs ket nasken nga addaan binulan nga sueldo nga di nasursurok ngem US$600,” kuna ni Lucero.
Mabalin nga agpili dagiti ODSP scholar iti tarigagay da nga programa/kurso iti maysa a CHEDaccelerated state college wenno unibersidad.
Kabayatanna, iti Education for Development Scholarship Program (EDSP) ket maysa nga tulong pinansial nga addaan gatad na nga PhP60,000 kada tawen ti eskuela.
Dagiti EDSP scholar ket kasta met. Mabalin da nga agpili iti tarigagay da nga programa wenno kurso iti aniaman a kolehio wenno unibersidad nga accredited ti Commission on Higher Education (CHED).
Maysa kadagiti kasapulan ket iti General Weighted Average nga di nababbaba ngem 85 porsiento iti amin nga academic ken non-academic nga asignatura iti naudi a tawen ti eskuela.
Iti agpada nga scholarship programs ket mabalinen nga gundawayan dagiti second agingga fifth-year college students nga kualipikado a dependent iti miembro ti OWWA-OFW.
 
PIA-LU/PMCJr/ABN