Huwag na sanang bumalik ang bagsik ng tatlong “G” – Gold, Guns at Goons

July 10, 2021 Editorial

Ang asasinasyon o pataksil na pagpatay ay ang gawang pagpaslang sa isang prominente o importanteng tao, gaya ng mga pinuno ng estado, mga pangulo ng gobyerno, mga politiko, maharlika, mga kilala at sikat na tao, o mga matataas na ehekutibo o opisyal ng mga negosyo.
Ang asasinasyon ay maaaring udyok ng mga motibong pulitikal at militar, o ginagawa dahil sa pinansiyal na ganansiya, upang ipaghiganti ang isang karaingan o hinanakit, isang pagnanasa na makamit ang katanyagan o kabantugan, o dahil sa isang militar, pang-seguridad, insurhensiya o sikretong pulis na grupo na magsasagawa ng asasinasyon.
Ang mga gawaing asasinasyon ay isinasagawa mula pa noong unang panahon. Isa ito sa pinakamatandang kasangkapan o paraan ng kapangyarihan sa pulitika na mula pa noong hanggang sa naitalang kasaysayan.
Ang pulitikal na asasinasyon ay naging bahagi na ng panlipunang realidad mula sa paglitaw ng komunal na panlipunang balangkas, gaya ng mga pinuno ng mga tribu, mga bayan-bayanan, at iba pang uri ng komunidad na palaging kinakailangang ipagtanggol ang kanilang pribilehiyong katayuan. Sa unang panahon ang asasinasyon ay prominenteng naitampok sa pagbangon at pagbagsak ng ilang pinakadakilang imperyo.
Sa makabagong panahon, ang asasinasyong pulitikal ay nagpapatuloy na gumaganap ng mahalagang papel sa pulitikal at prosesong panlipunan at sa ilang mga kaso ay may matinding epekto. Ang mga grupo ng insurhensiya ay kalimitang ginagamit ang asasinasyon bilang isang kasangkapan upang isulong ang kanilang layunin.
Nagbibigay ito ng ilang trabaho sa mga kagayang grupo na palisin ang partikular na mga kaaway at bilang gamit propaganda upang maitutok ang atensiyon ng media at pulitika sa kanilang ipinaglalaban. Mataga-tagal na ring walang insidente o kaso ng asasinasyon sa pambansang antas lalo na sa mga panahon ng halalan.
Subalit may mga kaso pa rin ng mga pagpatay na may kaugnayan sa pulitika sa mga probinsiya at mga bayan. Sa kasaysayan ng pulitika sa Pilipinas ay ilang libo na ba ang napapaslang lalo na kapag sumasapit ang pagdaraos ng halalan?
Sinikap din naman ng mga gobyernong nakalipas na buwagin at “patayin” ang mga pribadong armadong grupo ng mga maimpluwensiyang tao at pulitiko.
Katunayan ay tila nanahimik naman ang mga ito subalit tila nabubuhay na muli sila at muling nagpaparamdam at naghahasik na naman ng karahasan.
Nito lamang nakaraang linggo ay nabalisa ang mga residente ng probinsiya ng La Union dahil sa napaulat na nadiskubreng assassination squad sa probinsiya.
Hiniling ng mga residente sa Philippine National Police (PNP) na agad tugisin ang lider at financier ng diumano’y assassination squad kasunod ng pagkakahuli ng ilang miyembro ng grupo dahil sa pagpatay sa isang katiwala ng isang farm sa Bacnotan kamakailan.
Masyadong ninenerbiyos daw ang mga lokal na residente sa mga nangyayari sa probinsiya. Takot sila na maaaring maulit ang political killings noong 2018 dagil sa patuloy na presensiya ng isang gun-for-hire group sa probinsiya. Sinasabing ang mga miyembro dw ng grupong ito ay mga dating miyembro ng militar at pulis.
Iniimbestigahan pa ng mga awtoridad kung miyembro nga ng isang kilabot na gun-for-hire group ang mga naaresto at kung totoo nga na umiiral ang grupo.
Pinapaniwalaang ang pagpatay sa farm caretaker sa Bacnotan ay isang side contract lamang at naghahanda ang grupo para sa mga high-profile target bago pa man ang eleksiyon sa susunod na taon.
Sa kasaysayan ay palaging nasa listahan na isa sa mga “hot spot” ang probinsiya ng La Union tuwing sasapot ang halalan. Isang serye ng high-profile political killings ang nangyari sa probinsiya noong 2018, akbilang dito ang hindi pa nalulutas ba pagpatay kina Balaoan Vice Mayor Alfred Concepcion; Sudipen Mayor Alexander Buquing; at dating Second District Rep. Franny Eriguel.
Nasabi noon ni Senator Panfilo Lacson na isang dating PNP Chief na ang mga pagpatay noong 2018 ay nagpapahiwatig na ilang mga pulitiko ay nagbabayad ng mga armadong grupo bago ang 2019 eleksiyon, ganito rin kaya ang mangyayari dahil halalan na sa 2022?
Nangangamba ang mga residente ng La Union na baka lumutang uli ang assassination squad at mas marami pa ang maging biktima bago pa man ang eleksiyon sa 2022.
Hindi lamang ang mga taga-La Union ang nangangamba, dahil maaaring lumawak ang karahasan na may kaugnayan sa pulitika at eleksiyon dahil sa ngayon ay marami na ang mga krimeng nangyayari na kailangan sigurong bigyan-pansin at tutukan ng mga awtoridad. Unti-unti na anting nakakalimutan ang tatlong “G” – ang Gold, Guns at Goons…huwag naman sanang bumalik ang kulturang ito na pinaghihirapang alisin tungo sa mas malinis at mas mapayapang prosesong pulitikal at pamumuhay ng sambayanang Pilipino.