Ilocos Sur naghahanda sa ika-200 anibersaryo ng probinsiya sa 2018

February 4, 2017 Provincial

LUNGSOD NG VIGAN – Pinaghahandaan na ang selebrasyon ng ika-200 taon ng pagiging probinsiya ng Ilocos Sur sa Pebrero 2, 2018.
Ito ang inihayag ni Gobernador Ryan Luis V. Singson habang ginaganap ang Kannawidan Ylocos Festival 2017 na nag-umpisa noong Enero 27 at magtatapos sa Pebrero 12 dito sa lungsod ng Vigan.
Isang “royal decree” noong Pebrero 2, 1818 ang paghihiwalay ng Ilocos Sur at Ilocos Norte kung saan noo’y naging isang probinsiya ang Ilocos Sur na tinawag na rehiyong Ilocos at parte nito ang Luna, La Union at ang buong Abra.
Upang maganap ang selebrasyon ng araw na ito, inilunsad ang Kannawidan Ylocos Festival na ginaganap sa huling parte ng Enero hanggang ikalawang linggo ng Pebrero simula noong 1999.
Upang maging popular sa buong bansa ang kapistahan, naging bahagi na nito ang pag-iimbita ng gobyerno probinsiyal sa lahat ng empleyado ng gobyerno para maging parte ng mga aktibidad nito.
Ilan pa sa mga ginaganap sa kapistahan ay ang prusisyon ng mga patron nga mga bayan at siyudad ng lalawigan na ginaganap pagkatapos dumalo ng misa sa Saint Paul Cathedral sa siyudad na ito, “Period Costume Party” o pagtitipon na kung saan lahat ng mga dadalo ay dapat nakabihis ng kasuotang Pilipino, at tatlong araw para sa mga guro at mga estudyante na kung saan ay nagpapaligsahan ang mga bata sa mga sayaw at awiting nagpapakita ng kulturang Ilokano.
Iniimbitahan din ng gobyerno probinsiyal ang mga nasa ibang bayan upang umuwi at maibsan ang pangungulila sa mga kababayan.
Lahat ng ito ay paghahanda para sa selebrasyon ng dobleng sentenaryo ng Ilocos Sur bilang probinsiya sa 2018.
Umaasa ang gobernador at mga opisyal ng Sangguniang Panlalawigan na magiging kumpleto ang mga pamilya upang maranasan nila ang kakaibang kapistahang nagaganap lang sa loob ng 200 taon sa probinsiya. ICR/PIA-Ilocos Sur / ABN