P11M halaga ng marijuana, sinunog sa Kalinga

September 30, 2017 Provincial

CAMP DANGWA, LA TRINIDAD – Dahil sa patuloy na pinaigting na kampanya laban sa ilegal na droga ng gobyerno ay nasa P11 milyon halaga ng tanim na marijuana ang binunot ng panagsamang elemento ng Police Regional Office (PRO)-Cordillera, Philippine Drug Enforcement Agency (PDEA) at Philippine Army sa bulubundukin ng Kalinga.
Sa dalawang araw na operasyon sa Barangay Buscalan, Tinglayan mula Setyembre 20-21 ay nadiskubre ng mga awtoridad ang siyam na plantasyon ng marijuana sa Mt. Chumanchil, Sitio Bato, Loccong na may tinatayang sukat ng lupain na 6,900 square meters.
Sinira ng mga awtoridad ang 40,850 fully-grown marijuana plants na tinatayang nagkakahalaga ng P11.040 milyon at sinunog sa mismong lugar.
Binati ni Chief Superintendent Elmo Francis Sarona, PRO-Cor police regional director, ang tagumpay na trabaho ng mga tropa ng gobyerno at sinabing marami pang susunod na operasyon kaugnay ng kampanya laban sa illegal na droga ang isasagawa.
Sinabi ni Sarona na ang eradikasyon na tinawag na Oplan Katribu ay naging matagumpay dahil sa sama-samang trabaho ng mga personnel mula sa PNP Kalinga, PDEA-Cordillera, PDEA Cagayan Valley, Philippine Army at NBI-Cagayan Valley at aktibong pakikipagtulungan ng mga opisyal ng barangay at munisipyo ng Tinglayan.
Subalit inamin ni Sarona na ang eradikasyon ay hindi garantiyang lubos na mawawala ang tanim na marijuana sa lugar dahil ang pagtatanim nito ay isa sa mga pinagkukunan ng ikinakabuhay ng ilang residente sa lugar ngunit sinabi niyang ginagawa ng gobyerno ang lahat ng makakaya nito upang ipatupad ang mga plano at programa para mahadlangan ang pagsasaka ng marijuana.
Nanawagan pa si Sarona sa mga tao na nagtatanim ng marijuana na sa halip ay tutukan na lamang ang mga livelihood projects na natutunan nila mula sa lokal na gobyerno at non-government organizations bilang alternatibong pagkakakitaan at matulungan ang pagpapanatili ng kapayapaan at kaayusan sa rehiyon.
Inutusan ni Sarona ang lahat ng unit commanders na palakasin ang mga operasyon ng pulis at paigtingin ang intelligence build up laban sa mga personalidad na may kaugnayan sa illegal na droga at maparusahan sa ilalim ng batas at maipakulong.
Isinusulong sa Kamara ang panukalang batas na ‘Medical Marijuana’ upang maging legal ang paggamit ng marijuana bilang medisinal na gamot subalit marami pa rin ang tumututol dito. ABN