Brgy. chairman, 5 pa nahulian ng armas sa Pangasinan

June 18, 2017 Police Patrol

BALUNGAO, PANGASINAN – Isang barangay chairman ang kasama sa anim na kataong naaresto ng mga pulis na sabay-sabay na sinalakay ang iba’t ibang bahay sa Barangay San Julian, Balungao kamakailan kung saan nasamsam ng kapulisan ang maraming armas, kasama ang isang hand grenade, ayon sa ulat ng Pangasinan Police Provincial Office (PPPO).
Ang barangay chairman ay kinilalang si Wilson Gaon, 55, incumbent barangay chairman ng San Julian, Balungao. Nasamsam ng mga pulis mula sa kaniyang tirahan ang isang Colt Automatic Caliber .45 pistol, 51 bala ng Caliber .45, isang Norinco Caliber .45 pistol, at tatlong magazine assemblies para sa Caliber .45.
Ang mga sumalakay ay mula sa iba’t ibang pangkat ng pulisya sa pangunguna ni Supt. Virgilio Pascua, commander ng Provincial Public Safety Company (PPSC), na nagpatupad ng search warrants na inilabas ni Regional Trial Court Executive Judge Ferdinand Fe ng Branch 67 sa Bauang, La Union laban sa iba’t ibang suspek.
Ang mga suspek ay hinihinalang miyembro ng isang gun-for-hire group sa Eastern Pangasinan at ibang parte ng probinsiya.
Kasama sa naaresto ang magsasakang si Joel Lilagan, 36, na nagsuko ng isang caliber .45 Colt pistol na may magazine assembly, Caliber .38 revolver isang 9mm pistol na may magazine assembly, tatlong cartridges na naipaputok para sa Garand rifle bullets at isang holster.
Naaresto rin si Midi Lilagan, 35, isa ring magsasaka, nakita sa kaniyang bahay ang isang bullet-proof vest, isang Super Caliber .22 revolver, isang Caliber .45 pistol, isang magazine assembly ng caliber .45, isang magazine assembly ng caliber .30, mga bala ng iba’t ibang kalibre ng baril, isang camouflage sniper belt, isang camouflage pouch, at isang sling bag.
Sa isa pang bahay, naaresto rin si Efren Ormita, 35. Nakita ng mga pulis sa kaniyang bahay ang isang M16 Armalite rifle, isang magazine assembly ng M16 rifle, 35 na bala ng Caliber 5.56, isang Caliber 9mm pistol Berretta na may isang magazine assembly, isang silencer ng 9mm pistol, 13 bala ng caliber 9mm, isang hand grenade, apat na bala ng Caliber .45, walong cartridge cases na naipaputok na para sa Caliber .45, 12 cartridge cases na naipaputok para sa Cal 5.56, siyam cartridge cases na naipaputok na para sa carbine, isang inside holster, isang bandolier, isang itim na sling bag, isang camouflage sling bag at dalawang clips ng Garand rifle.
Naaresto rin sina Julito Asuncion, 24, kung saan nakita sa kaniyang bahay ang isang rifle grenade at 24 live ammunition; at Christopher Oria, 26, na nakitaan ng isang Colt Cal. .45, pitong ammunition, isang home-made Cal .22 at isang magazine.
Samantala, isa pang suspek na si Jerry Laligan ay wala sa kaniyang bahay nang masiyasat ng mga pulis ang isang hand grenade na nakalagay sa isang pouch.
Ang pagsisiyasat ay isinagawa nang maayos sa harap ng ibang barangay officials ng San Julian at iba pang saksi.
Ang anim na naaresto ay dinala sa Eastern Pangasinan District Hospital para sa medical examination at pagkatapos ay dinala sa PPSC headquarters sa bayan ng Tayug. LVM / PNA