Kahit pa may peligro sa pagtupad ng tungkulin

February 25, 2017 Editorial

Sa mundong ito ay may kani-kaniya tayong tungkulin na tinutupad. Sa gobyerno man o sa pribadong sektor, saan mang larangan o antas ng lipunan ay may hanay ng mga tagapagpatupad ng anumang utos, doktrina, alituntunin o batas. Ang pagtupad ng tungkulin kung minsan ay kaakibat ang sakripisyo at maging ang sariling interes at buhay man ay nasasalang sa matinding pagsubok at panganib.
Ilan na ba ang nasulat at naitala sa kasaysayan ng mga taong nagsakripisyo at nagbuwis ng buhay matupad lamang ang tungkulin at mayroon ding mga pangyayaring hindi naibalita.
Isa na marahil ang hindi makakalimutang trahedya sa kasaysayan ng Pilipinas ang pagtupad ng tungkulin ng mga miyembro ng Special Action Force ng PNP na kung saan ay magsisilbi lamang sila ng “warrant of arrest” sa dalawang international terrorists sa Mamasapano, Maguindanao sa Mindanao noong Enero ng taong 2016. Bagama’t naisilbi ang mandamiyento at napatay ang isang kilabot na tinaguriang most wanted person ay naging kapalit naman ang buhay ng apatnapu’t-apat na miyembro ng SAF, isang pangyayaring labis na ipinagluksa hindi lang ng mga mahal sa buhay ng mga nasawi kundi ng buong sambayanan at maging ng buong mundo, at tinagurian itong SAF 44.
Pebrero 21 taong ito nang sumambulat ang balitang apat na pulis ang napatay sa Lubuagan, Kalinga na magsisilbi lamang (uli) ng “warrant of arrest” sa ikaapat na most wanted person sa bansa. Bagama’t napatay din ang taong pakay ay kapalit muli ang apat na buhay at ikinasugat ng ilan pang pulis na tumutupad lamang ng sinumpaang tungkulin.
Sa dalawang insidente ay tila may makikitang ilang mahahalagang bagay na kailangang pansinin at maaaring makatulong sa pagbuo ng mga gabay sa pagpapatupad ng mga kautusan at operasyon sa hinaharap. Una ay parehong kilalang delikadong lugar ang dalawang pinangyarihan ng insidente, dito marahil ay nagkulang sa pagplano at “intelligence network” para madetermina ang sitwasyon ng lugar (dahil lumalabas ayon sa ulat na tinutulungan ng komunidad ang mga pakay na tao); pangalawa ay ang puwersa ng maghahain ng mandamiyento de aresto, kung kailangan bang pulis lamang ang magsisilbi o kinakailangan ang ayuda ng militar dahil ang parehong lugar ay kilala nga na baluwarte ng mga rebelde.
Ang dalawang insidente ay ilan lamang sa maraming patunay ng peligro sa pagtupad ng isang tungkulin. Bagama’t sa kaso ng SAF 44 ay nabigyan na ng pinansiyal, pangkabuhayan at pang-eduksyon na tulong ang pamilya ng mga nasawi at sa kaso naman sa Lubuagan, Kalinga ay nangako na rin ang liderato ng kapulisan at gobyerno ng kaukulang tulong sa mga naulila at pamilya ng mga nasawi ay humihingi at sumisigaw pa rin sila ng katarungan.
Ang mga nasawing pulis na ito ay halimbawa lamang ng katotohanang higit sa pagnanais nilang maitaguyod ang pamilya kahit gaano kadelikado ang kanilang trabaho at kahit pa mawalay sila sa kanilang mahal sa buhay dahil sa layo ng kanilang destino ay nangingibabaw pa rin ang sinumpaang tungkulin – ang sumunod sa utos ng mga nakakataas maitaguyod at maipatupad lamang ang batas kahit pa katumbas nito ang kanilang buhay. Sila rin ay may “karapatang pantao” dahil walang katumbas na halaga ang pagdadalamhati at pangungulila ng mga naiwang mahal sa buhay. Pmcjr