Ang magwagi dahil sa pagpatay ay masamang pamamahala

October 14, 2018 Editorial

Ang huling kaso ng pagpatay sa alkalde ng Sudipen, La Union at ikinasugat din ng kaniyang asawa na siya ring bise-alkalde ng bayan ay nagdulot na naman ng panibagong pangamba na ang batas at kaayusan sa bansa ay nasa mahina ng kalagayan at tila lumalala pa. Nasa 16 na ang bilang ng pinapatay na mayor mula nang maupo si Pangulong Rodrigo Duterte noong 2016.
Sa barangay at SK elections nitong Mayo 14 ay mahigit 30 ang naitalang insidente ng pagpatay sa buong bansa na may kaugnayan sa halalan. Ang ilang biktima ay iniuugnay ng mga awtoridad sa ilegal na droga at ang ilan ay pinaniniwalaang mga biktima ng away pulitika.
Subalit ang huling serye ng pagpatay sa mga mayor ayon sa mga kritiko ng Pangulong Duterte ay ‘nagpapakita lamang sa patuloy na klima ng kalayaan’ na pinalala pa ng giyera sa droga ni Duterte. Diretsahang ipinahayag ng mga grupo ng human rights na ginagamit lamang ng Pangulo ang giyera kontra droga para pagtakpan ang pagsupil sa mga kalaban sa pulitika at mapilitang humanay kapanalig niya dahil sa takot.
May mahabang kasaysayan ng mga pagpatay na nauugnay sa pulitika ang Pilipinas. Ginagamit ng malalakas na politiko ang pataksil na pagpatay upang mapanatili at makontrol ang kanilang mga teritoryo. Bakit kaya handang pumatay ang isang kandidato at mamatay para sa posisyon? Dahil kaya sa may malaking kita at benepisyo o kaya’y talagang naging kalakaran na at minsa’y negosyo na rin dahil karamihan ng mga nasa likod ng mga pagpatay ay nakakawala sa kanilang krimen?
Ang karahasan tuwing halalan ay patuloy at di-maputol putol saan man panig ng bansa. Ang pagpatay bilang sukdulang armas pulitikal ay ang pinakamasamang paraan ng pagpapahina sa malayang halalan at pagsupil sa kagustuhan ng tao. Sa kabila nito ay kakaunting may-sala ang nahuhuli na dahilan para dumami pa ang mga pag-atake. Ilan na ba ang isinagawang pag-atake, ilan na ba ang namamatay at ilan na ba ng nakaligtas at ilang kaso na ba ang nareresolba?
Itong Oktubre 11 hanggang Oktubre 17 ay petsa ng paghahain ng kandidatura sa mga posisyon sa lokal na pamahalaan, kongreso at senado at kasunod na ang umaatikabong kampanya sa halalan sa Mayo 2019. Hindi maiwasang muling mangamba ang taong-bayan na muling magkakaroon ng karahasan at pagpatay dahil na rin sa tunay na pagiging mainit na halalan sa bansa. Inamin ng tagapagsalita ng PNP na kung pag-aaralan ang lahat ng halalan, at pagkatapos ng halalan ay mayroon daw talagang pag-usbong nga mga kaso. Kaya nagpalabas diumano ang Chief PNP ng direktibang habulin ang mga ‘guns for hire’ at mga ‘private armed groups’ upang mahadlangan ang mga pagpatay sa mga opisyal ng lokal na pamahalaan.
Sa nakaraang mga pagpatay ay 10 na raw ang nareresolba at sarado na ayon pa sa tagapagsalita ng PNP maliban sa kaso ng pataksil na pagpatay kay Mayor Antonio Halili ng Tanauan City. Gayundin ang anim na kaso ng pagpaslang sa mga vice mayor ay naresolba na rin. Binuo ang PNP National Investigation Task Group upang tumutok sa bawat kaso ng pagpatay sa mga lokal na opisyal.
Umaasa tayo na tunay na ngang naresolba ang mga kaso at ang mga tunay na may-sala ang mapapanagot dito. Sa papalapit na halalan sa 2019 ay nakaamba na naman ang posibleng karahasan bagamat idinadalangin natin na hangga’t maaari ay wala ng kaso ng pagpatay o anumang karahasan at sa kabila ng paniniguro ng PNP na handa sila kung mayroon mang insidente ng pag-atake, ang bilang ng kaso ng pagpaslang ay tiyak tataas hanggat makita ng taong-bayan ang mataas na posibilidad ng mga salarin – mga pumatay at utak nito ay mahuli at maparusahan. PMCJr.