Pagdinig sa mas maraming boses, sandigan sa hamon ng pagbabago

September 10, 2018 Editorial

Ang pag-usbong ng Internet ay nakita ng media practitioners bilang pinakamalaking bagay na mangyayari mula ng maimbento ang printing press. Binago nito, at patuloy na binabago ang komunikasyon. Ibinibigay ng Internet sa mga mambabasa ang pinakamalawak na eskaparate ng impormasyon na pagpipilian sa isang pinakamabilis na pamamaraan. Binigyan nito ang mga mambabasa ng daan upang ilahad ang kanilang mga opinyon nang malaya na hindi kinakailangang ma-edit o ma-censor. Ibinibigay din nito ang mga balita ng halos kasabay na ng mga pangyayari.
Dahil ibinibigay ng makabagong teknolohiya sa mga parokyano nito ang impormasyong gusto nila at kung paano nila ito gugustuhin ay naungusan nito ang mga diyaryo. Naging alarma ito sa mga publishers sa buong mundo na inihayag ang kanilang pangamba, kabilang na ang Amianan Balita Ngayon sa maaaring pagkamatay ng diyaryo.
Ang laban ay mas nararamdaman ng mga community newspaper sa mga probinsiya kung saan nararating ng TV at radyo ang mas maraming tao, kaya nakukuha nila ang mas malaking bahagi ng advertising. Patunay ang mga nakaraang halalan na karamihan ng badyet sa kampanya para sa publisidad ay napunta sa broadcasting. Bilang mga publishers ay nakikita namin na mas kokonti ang handang bumili ng subscription o bumili ng kopya ng diyaryo sa kalye, malayo sa sitwasyon noon na madaling bumili ang mga tao na nakasanayan nang magbasa na tila mahirap pigilan.
Dahil malaki pa rin ang pangangailangan sa mga balita at impormasyon ay nakikita ng pamunuan ng ABN na ito ang pinakamalaking oportunidad para sa news media. Kaya sa ikapitong taon ay gagawin namin ang lubos naming kakayahan, pag-iibayuhin ang paglalahad ng istorya na may layunin. Maaaring dumami na ang platforms at nangangailangan ng mas bagong kakayahan subalit nananatili pa rin ang misyon ng pamamahayag – ang magbigay impormasyon, maglahad ng katotohanan, at impluwensiyahan ang lipunan para sa kapakanan ng publiko.
Dahil kami bilang ‘community newspaper’ na mas nakatutok sa lokal na mga pangyayari ay nais naming makinig sa mas maraming boses upang matanto ang isang depenisyon kung ano ang pamamahayag sa makabagong panahong ito. Kaya upang manatili ang pahayagan sa gitna ng matinding kompetisyon ay kailangang pakinggan ng mas taimtim sa kung ano ang masasabi ng mga mambabasa, lalo na sa uri ng balita na gusto nilang basahin. Ayaw naming mawala ang ugnayan sa mga mambabasa kaya isinaalang-alang namin ang gustong istorya ng tao kaysa kung may istorya ba. At kahit na nauuso ang ‘citizen journalism’ ay nais pa rin ng tao na mabigyan sila ng wastong balita, kaya ang dyurnalista ngayon at maging ang mga susunod pa ay kailangang hindi lang magaling na tagakalap ng impormasyon kundi isang bihasang tagapagsalin ng balita.
Upang makaagapay ay kailangang harapin ng ABN ang hamon ng makabagong teknolohiya kaya imbes na labanan ito ay sasali na rin tayo sa mundo ng Internet. Sa buwang ito, sa ikapitong taong anibersaryo ng pahayagan ay ilulunsad ang ABN Online News na layong maging komplemento ng print versions ng pahayagan gayundin upang mas madaling marating ang malawak na mambabasa sa digital medium – dito sa bansa at sa ibayong dagat.
Habang nangangamba ang mga may-ari ng mga pahayagan at mga print journalists sa hinaharap ng kanilang medium ay minabuti ng pamunuan at bumubuo ng ABN na tingnan ang sitwasyon sa mas malawak na pananaw. Upang mapanatili ang pahayagan, ano ba ang nais na iligtas, ang balita ba o ang papel? Ang medium ba o ang nilalaman? Sa ganang amin, kung kaya rin lang ay nais naming iligtas pareho.
Kailangan naming panatilihin ang bukas na pananaw at yakapin ang pagbabago na may mahigpit na tangan sa aming mga prinsipiyo sa pamamahayag at maging dalubhasa sa mga pangangailangan ng mga komunidad.
Sa pitong taon na PAG-IBIG, PANGANGALAGA at PAMAMAHAGI sa ibabaw ng pinaigting na community journalism at serbisyo sa mga tao sa Hilagang Luzon, ay nais pa rin naming ipagpatuloy ito sa mas maraming taon pa – na kasama pa rin kayo.
Maraming salamat po sa inyong suporta!    PMCJr.