Sa Buwan ng mga Guro – ‘Turo Mo, Kinabukasan Ko’

September 19, 2018 Editorial

Itinatadhana sa Artikulo XIV ng Saligang Batas na: Seksyon 1. Dapat pangalagaan at itaguyod ng Estado ang karapatan ng lahat ng mga mamamayan sa mahusay na edukasyon sa lahat ng antas at dapat magsagawa ng angkop na mga hakbang upang matamo ng lahat ang gayong edukasyon. Sek. 5 (4) Dapat patingkarin ng Estado ang karapatan ng mga guro sa pagsulong na propesyonal. Dapat magtamasa ng proteksyon ng Estado ang mga tauhang akademiko na di-nagtuturo at mga tauhang di-akademiko. (5) Dapat mag-ukol ang Estado ng pinakamataas na prayoriti sa pagbabadyet sa edukasyon at seguruhin na magaganyak at mapamamalagi ng pagtuturo ang nararapat na kaparte nito sa pinakamahuhusay na mga talino sa pamamagitan ng sapat na gantimpala at iba pang paraan ng kasiyahan at katuparan sa gawain.
Nakatanggap ang Department of Education ng pinakamalaking bahagi ng panukalang badyet sa taong 2019 subalit pinakamalaki naman ang tinapyas dito. Patuloy pa rin ang deliberasyon sa panukalang badyet na P3.7 trillion na kung saan ay tinapyasan ng P 51 bilyon mula sa higit P580 bilyon na magiging P528 bilyon na lamang sa 2019. Sa mababang badyet na ito ay magha-hire ang DepEd ng mas kaunting mga bagong guro, magtatayo ng limitadong bilang ng mga silid-aralan at mababawasan ang bilang ng mga textbooks na maiimprenta. Mula 47,000 bagong silid-aralan noong 2018, sa bagong pondo ng DepEd ay maaari lamang makapagpatayo ng karagdagang 4,000 silid-aralan. Makaka-hire lamang ang ahensiya ng nasa 10,000 bagong guro na mula sa mahigit 80,000 noong nakaraang taon. Mula sa higit 39 milyon textbooks ngayong taon ay makakapag-imprenta lamang ang DepEd ng nasa 8.9 milyon textbooks sa 2019.
Kung ang kabataan ay ang pag-asa ng ating kinabukasan, ang uri ng kinabukasan na naghihintay sa atin ay nakasalalay sa kamay ng mga guro. Hindi naman lingid sa mga nagnanais maging guro na hindi magiging magaan ang pagtuturo dahil sa marami ding pagsubok at pagtitiis ang haharapin. Malimit na suliranin at daing ng mga guro ay ang malaking bilang ng mag-aaral na nagsisiksikan sa bawat silid-aralan na kulang pa sa bentilasyon; minsan o malimit na sariling pera nila ang ginagastos sa ilang aktibidad sa paaralan, mga gamit at kasangkapan sa silid-aralan pati ang photocopying ng test papers, handouts at iba pang learning materials. Lahat ito dahil sa no-collection policy. May sariling buhay at pamilya rin ang mga guro at ang kakulangan ng kanilang sahod ay napakahirap din para sa kanila na itawid ang pang-araw-araw na pamumuhay nila. Mahirap para sa mga guro ang magreklamo sa sistemang umiiral sa DepEd at baka mapag-initan at tanggalin sa panakot na maraming nakapilang guro na puwedeng pumalit sa kanila. Udyok ng pagmamahal sa trabaho at bokasyon ay minamabuti na lamang ng nakakarami na magsawalang-kibo.
Ang hinaing na ito ng mga guro ay paulit-ulit na lamang mula pa noon, ang karagdagang sahod ang laging isinisigaw at nadagdagan pa ang kalbaryo nila sa mga idinagdag na paperworks at forms, na kung hindi pa nag-ingay ang sektor ng mga guro sa magkasunod na pagpapakamatay ng dalawang guro na iniiugnay sa bigat at dagdag na trabaho bukod sa pagtuturo ay kinitil ang sariling buhay, ay hindi binawasan ang mga requirements mula 36 na ginawang 10 na lamang.
Ngayon, paano maisasakatuparan ang isinasaad ng saligang batas ukol sa edukasyon kung mas pinababa pa ang badyet ng DepEd, paano pa makakamit ang mahusay na edukasyon, paano pa patitingkarin ang propesyunal na paglago ng mga guro at paanong masisiguro ang pangangalaga, pagtataguyod at karapatan ng bawat kabataang Pilipino sa edukasyon kung ang mga guro ay nanglulupaypay, pinagkaitan ng disenteng sahod at pinagpasan ng mabigat na trabaho, sa hindi tamang pagtrato, hindi nirerespeto, at tila kakulangan ng suporta ng gobyerno sa kanila?
Tama, ang pagtuturo ay ang pinakamarangal na bokasyon, subalit paano ipaparating ng epektibo ang mataas na kuwalidad ng edukasyon kung tigib naman sa kahirapan ang mga magdudulot nito? Paano sila magtuturo ng maayos para sa kinabukasan sa ilalim ng ganitong sitwasyon? PMCJr.